Ўзбекистонда 2 июнь соат 10:00 ҳолатига кўра коронавирусга чалинганлар сони 16 кишига кўпайиб, 3718 нафарга етди, дея хабар бермоқда Соғлиқни сақлаш вазирлиги.
Янги касалланиш ҳолатларининг 12 таси Тошкент вилоятидаги карантин марказидаги фуқаролар орасида аниқланган — уларнинг бари Қозоғистон орқали кириб келган.
Наманган ва Тошкент вилоятларига хориждан кириб келган бир нафардан халқаро юк ташувчи машина ҳайдовчиларида ҳам коронавирус инфекцияси аниқланган.
Бундан ташқари, Тошкент шаҳрининг Яшнобод туманида аҳоли орасида иккита касалланиш ҳолати аниқланган.
Айни вақтда 844 нафар бемор даволанишни давом эттирмоқда. Соғлиқни сақлаш вазирлиги маълумотларига кўра, уларнинг 9 нафари оғир, 2 нафари эса ўта оғир аҳволда.
Эслатиб ўтамиз, шу вақтгача Ўзбекистонда коронавирусга чалинган беморларнинг 2859 нафари соғайган, 15 нафар бемор эса касаллик асоратлари оқибатида вафот этган.
Изоҳ (0)