Афро-америкалик Жорж Флойд вафотидан кейин бошланган норозилик намойиши қатнашчилари Манхеттендаги бир нечта дўконларни талон-торож қилди, деб хабар бермоқда CBS New York.
Талончилик дастлаб Челси ҳудудидан бошланган, шундан сўнг намойишчилар Соҳо, Флэтайрон ва Мидтаундаги бир нечта дўконларни ўмарган. Хусусан, ўғрилик Michael Kors, Nintendo, AT&Т ва Chanel каби дўконларда содир этилган.
«РИА Новости»нинг ёзишича, уларнинг аксарияти кўринишидан 25 ёшлар атрофидаги ёшлар бўлиб, спорт товарлар, электроника ва заргарлик дўконларини ҳам ўмарган.
Қайд этилишича, кўплаб дўконлар коронавирус пандемияси туфайли ишламаган. Кичик компаниялар ёки жисмоний шахслар эгалик қиладиган уларнинг айримлари эса дўконларга зарар етгани учун очилмаслиги мумкин.
Намойишчилар соат 23:00 дан кейин комендантлик соати жорий этилганига қарамай Нью-Йорк кўчаларида юришда давом этган.
АҚШда норозилик ҳаракатлари бир ҳафтадан бери давом этмоқда. Намойишчилар дастлаб Миннеаполис кўчаларига чиққан эди, кейинчалик эса кўплаб йирик шаҳрларни ҳам қамраб олди. Бунга Миннеаполис шаҳри полицияси вакили 25 май куни 46 ёшли афро-америкалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босгани оқибатида унинг вафот этгани сабаб бўлган.
Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди. Дональд Трамп Оқ уй қаршисида содир бўлган норозилик намойиши вақтида ерости бункерига беркингани маълум бўлди.
Изоҳ (0)