Ўлимидан сўнг АҚШда оммавий норозилик намойишлари бошланган афро-америкалик Жорж Флойд қотиллик натижасида бўғилиб ўлган. Бу каби хулоса эркакнинг жасадини ёриб кўрган мустақил икки нафар суд-тиббиёт эксперти томонидан берилди, деб хабар қилади Reuters.
«Механик асфиксия ўлим сабаби ҳисобланади, қотиллик эса ўлим усули», — дейди Мичиган университети доктори Аллесия Уилсон.
Флойднинг оиласини илтимосига кўра, унинг жасадини ёриб кўришда иштирок этган шифокорлардан бири Майкл Баден марҳум ўлимга олиб келадиган ҳеч қандай касаллик билан оғримаганини маълум қилди. Унинг қўшимча қилишича, ўлим бўйин ва елкани қаттиқ босиш оқибатида юзага келган.
Аввалроқ Ҳеннепин округи (Миннесота штати) суд-тиббиёт экспертлари бошқача хулоса берганди. Уларнинг маълумотларига кўра, Флойд бўғилиб ўлмаган. Суд-тиббиёт экспертларининг таъкидлашича, афро-америкаликнинг ўлими ундаги касалликлар, шунингдек, интоксикация ва ҳаракатсиз қолгани оқибатида юзага келган.
Миннеаполис шаҳри полицияси вакили 25 май куни 46 ёшли афро-америкалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди. Дональд Трамп Оқ уй қаршисида содир бўлган норозилик намойиши вақтида ерости бункерига беркингани маълум бўлди.
Изоҳ (0)