Afro-amerikalik Jorj Floyd vafotidan keyin boshlangan norozilik namoyishi qatnashchilari Manxettendagi bir nechta do‘konlarni talon-toroj qildi, deb xabar bermoqda CBS New York.
Talonchilik dastlab Chelsi hududidan boshlangan, shundan so‘ng namoyishchilar Soho, Fletayron va Midtaundagi bir nechta do‘konlarni o‘margan. Xususan, o‘g‘rilik Michael Kors, Nintendo, AT&T va Chanel kabi do‘konlarda sodir etilgan.
“RIA Novosti”ning yozishicha, ularning aksariyati ko‘rinishidan 25 yoshlar atrofidagi yoshlar bo‘lib, sport tovarlar, elektronika va zargarlik do‘konlarini ham o‘margan.
Qayd etilishicha, ko‘plab do‘konlar koronavirus pandemiyasi tufayli ishlamagan. Kichik kompaniyalar yoki jismoniy shaxslar egalik qiladigan ularning ayrimlari esa do‘konlarga zarar yetgani uchun ochilmasligi mumkin.
Namoyishchilar soat 23:00 dan keyin komendantlik soati joriy etilganiga qaramay Nyu-York ko‘chalarida yurishda davom etgan.
AQShda norozilik harakatlari bir haftadan beri davom etmoqda. Namoyishchilar dastlab Minneapolis ko‘chalariga chiqqan edi, keyinchalik esa ko‘plab yirik shahrlarni ham qamrab oldi. Bunga Minneapolis shahri politsiyasi vakili 25-may kuni 46 yoshli afro-amerikalik Jorj Floydni qo‘lga olish chog‘ida uni tutib, yerga yotqizgan va tizzasi bilan bo‘ynini bosgani oqibatida uning vafot etgani sabab bo‘lgan.
Holat aks etgan video ijtimoiy tarmoqlarda tarqalgach, AQShning turli hududlarida norozilik namoyishlari boshlangan. AQShning 25 ta shahrida ommaviy noroziliklar sabab komendantlik soati e’lon qilindi. Donald Tramp Oq uy qarshisida sodir bo‘lgan norozilik namoyishi vaqtida yerosti bunkeriga berkingani ma’lum bo‘ldi.
Izoh (0)