АҚШда сўнгги 25 йилдан буён биринчи бор барча федерал қамоқхоналар ёпилди. Мазкур қарор полиция томонидан қўлга олинганидан сўнг, вафот этган афро-америкаликнинг ўлими сабаб юзага келган тартибсизликлар фонида қабул қилинди. Бу ҳақда АҚШ Қамоқхоналар бюросининг хатига таяниб, Government Executive хабар берди.
«Бюро бутун мамлакат бўйлаб давом этаётган ваҳима ва тартибсизликлар сабаб соат 16:00 дан (Тошкент вақти билан 2 июль соат 01:00) миллий локдаун (ўта қаттиқ режим) жорий этди», — дейилади хабарда.
Бюро ўз хатида 165,5 мингга яқин маҳбус сақланадиган 122 та ахлоқ тузатиш муассасаларини санаб ўтган. Ушбу қамоқхоналардаги жами ходимлар қарийб 37 минг кишини ташкил этади. Идоранинг таъкидлашича, бу каби чоралар маҳбуслар ва ишчилар хавфсизлигини таъминлаш мақсадида жорий этилмоқда. Локдаун мамлакатдаги тартибсизликлар тинчимагунча давом этади.
Бундан икки ой олдин бюро коронавирус тарқалишининг олдини олиш мақсадида қисман блоклашни амалга оширганди. Ўшанда маҳбусларга 14 кун давомида камералардан чиқмаслик буюрилган. Уларга кир ювиш, ювиниш хоналарида, компьютер зоналарида ва учрашув хоналарида оммавий тўпланиш тақиқланган. Шунингдек, таълим дастурлари ва даволаниш машғулотларига қатнаш олдинги режимда қолаверган. Бундан ташқари, 22 майдан бошлаб Америка қамоқхоналарида енгил жиноят содир этганларни қўйиб юбориш бошланган.
Жануби-шарқий минтақадаги Қамоқхона кенгаши вице-президенти Жо Рохаснинг сўзларига кўра, ҳукумат тўлиқ локдаунни сўнгги бор 1995 йили амалга оширган. Ўша вақтда бунга Талладега (Алабама штати), Алленвуд (Пенсильвания), Мемфис (Теннесси) ва Гринвиллда (Иллинойс) жойлашган ахлоқ тузатиш муассасаларидаги тартибсизликлар сабаб бўлган. Норозиликка конгрессда ҳукуматнинг гиёҳванд моддаларга оид жиноятларни қисқартиришдан бош тортишига овоз берилгани сабаб бўлгани тахмин қилинган.
Мавзуга доир: Трамп Оқ уй қаршисида содир бўлган норозилик намойиши вақтида ерости бункерига беркингани маълум бўлди
Изоҳ (0)