Бухоро нефтни қайта ишлаш заводида Аи-91, Аи-93, Аи-95 маркали юқори октанли бензин ишлаб чиқариш ва Аи-80 маркали бензин ишлаб чиқаришдан бутунлай воз кечиш, шунингдек, тўлиқ Евро-5 талабларига жавоб берадиган дизель ёқилғисини ишлаб чиқаришга ўтиш кутилмоқда. Бу ҳақда «Ўзбекнефтгаз» матбуот хизмати хабар берди.
Маълум қилинишича, «Ўзбекнефтгаз» акциядорлик жамияти бошқаруви раиси Меҳриддин Абдуллаев ва ишчи гуруҳ аъзолари Бухоро нефтни қайта ишлаш заводига ташриф буюриб, завод мутахассислари ҳамда заводни модернизация қилиш ва реконструкция қилиш лойиҳасини амалга оширувчи гуруҳ билан учрашди.
Ташриф давомида Президентнинг «Нефть ва газ саноатининг молиявий барқарорлигини оширишнинг биринчи навбатдаги чора-тадбирлари тўғрисида»ги 2020 йил 4 апрелдаги қарорига мувофиқ, нефть нархларининг глобал ўзгариши шароитида корхонанинг молиявий-иқтисодий аҳволи, заводнинг мавжуд технологик қувватлари, етказиб берилаётган хом ашё нархлари, жумладан, маҳалий нефть нархига ва 2020 йил 1 майдан кучга кирган биржа савдолари орқали нефть маҳсулотларини сотиш тартибига алоҳида эътибор қаратилди.
Шунингдек, Бухоро нефтни қайта ишлаш заводини модернизация қилиш ва реконструкция қилиш лойиҳасини амалга ошириш истиқболлари муҳокама қилинди. Маҳсулотларни ички ва экспорт бозорларида сотиш, хом ашё базасини аниқлаш ва таъминлаш, лойиҳанинг техник ва иқтисодий кўрсаткичлари, нефть нархидаги ўзгаришларнинг турли вариантлари бўйича лойиҳанинг техник-иқтисодий кўрсаткичлари, шунингдек, заводни модернизация ва реконструкция қилиш инвестиция лойиҳасини қайтариш масалалари кўриб чиқилди.
«Заводни модернизация қилиш ва реконструкция қилиш бўйича инвестиция лойиҳасини амалга ошириш натижасида Аи-91, Аи-93, Аи-95 маркали юқори октанли бензин ишлаб чиқариш ва Аи-80 маркали бензин ишлаб чиқаришдан бутунлай воз кечиш, шунингдек, тўлиқ Евро-5 талабларига жавоб берадиган дизель ёқилғисини ишлаб чиқаришга ўтиш кутилмоқда», — дейилади компания хабарида.
Компания раиси ва ишчи гуруҳ аъзолари ташриф давомида заводнинг асосий ишлаб чиқариш объектларини кўздан кечирди ва режалаштирилаётган янги технологик қурилмаларнинг қурилиши жойи билан танишди.
Қайд этилишича, ташриф якунида инвестицион лойиҳани босқичма-босқич амалга ошириш учун тақдимотни тайёрлаб топшириш, шунингдек, Феед лойиҳасини, шу жумладан, инвестиция лойиҳасини амалга ошириш учун имтиёзли кредит шартлари бўйича таклифларни ўрганиш ва жорий этиш бўйича топшириқлар берилди.
Аввалроқ «Ўзбекнефтгаз» компанияси бензин импортига акциз солиғини 5 фоиздан 20 фоизга оширишни таклиф қилганди. Шу билан бирга, нефтни қайта ишлаш заводларининг ишлаб чиқариш қувватини таъминлаш мақсадида «Ўзбекнефтгаз» айрим тайёр нефть маҳсулотларининг импортига солинадиган акциз солиғи ставкаларини қайта кўриб чиқишни сўраган.
Молия вазирлиги эса бугунги кунда ишлаб чиқарилган нефть маҳсулотлари ва импорт бўйича ставкалари турлича бўлган акциз солиғининг ягона ставкасини ўрнатиш режалаштирилаётганини маълум қилди, бироқ Энергетика вазирлиги нефть маҳсулотларини импорт қилиш бўйича акциз солиғи ставкаларини қайта кўриб чиқиш бўйича таклиф киритмаганини билдирди.
Монополияга қарши курашиш қўмитаси эса Ўзбекистонда импорт бензин учун акциз солиғи оширилишини мақсадга мувофиқ эмас деб топди.
Изоҳ (0)