Buxoro neftni qayta ishlash zavodida Ai-91, Ai-93, Ai-95 markali yuqori oktanli benzin ishlab chiqarish va Ai-80 markali benzin ishlab chiqarishdan butunlay voz kechish, shuningdek, to‘liq Yevro-5 talablariga javob beradigan dizel yoqilg‘isini ishlab chiqarishga o‘tish kutilmoqda. Bu haqda “O‘zbekneftgaz” matbuot xizmati xabar berdi.
Ma’lum qilinishicha, “O‘zbekneftgaz” aksiyadorlik jamiyati boshqaruvi raisi Mehriddin Abdullayev va ishchi guruh a’zolari Buxoro neftni qayta ishlash zavodiga tashrif buyurib, zavod mutaxassislari hamda zavodni modernizatsiya qilish va rekonstruksiya qilish loyihasini amalga oshiruvchi guruh bilan uchrashdi.
Tashrif davomida Prezidentning “Neft va gaz sanoatining moliyaviy barqarorligini oshirishning birinchi navbatdagi chora-tadbirlari to‘g‘risida”gi 2020-yil 4-apreldagi qaroriga muvofiq, neft narxlarining global o‘zgarishi sharoitida korxonaning moliyaviy-iqtisodiy ahvoli, zavodning mavjud texnologik quvvatlari, yetkazib berilayotgan xomashyo narxlari, jumladan, mahaliy neft narxiga va 2020-yil 1-maydan kuchga kirgan birja savdolari orqali neft mahsulotlarini sotish tartibiga alohida e’tibor qaratildi.
Shuningdek, Buxoro neftni qayta ishlash zavodini modernizatsiya qilish va rekonstruksiya qilish loyihasini amalga oshirish istiqbollari muhokama qilindi. Mahsulotlarni ichki va eksport bozorlarida sotish, xomashyo bazasini aniqlash va ta’minlash, loyihaning texnik va iqtisodiy ko‘rsatkichlari, neft narxidagi o‘zgarishlarning turli variantlari bo‘yicha loyihaning texnik-iqtisodiy ko‘rsatkichlari, shuningdek, zavodni modernizatsiya va rekonstruksiya qilish investitsiya loyihasini qaytarish masalalari ko‘rib chiqildi.
“Zavodni modernizatsiya qilish va rekonstruksiya qilish bo‘yicha investitsiya loyihasini amalga oshirish natijasida Ai-91, Ai-93, Ai-95 markali yuqori oktanli benzin ishlab chiqarish va Ai-80 markali benzin ishlab chiqarishdan butunlay voz kechish, shuningdek, to‘liq Yevro-5 talablariga javob beradigan dizel yoqilg‘isini ishlab chiqarishga o‘tish kutilmoqda”, — deyiladi kompaniya xabarida.
Kompaniya raisi va ishchi guruh a’zolari tashrif davomida zavodning asosiy ishlab chiqarish obyektlarini ko‘zdan kechirdi va rejalashtirilayotgan yangi texnologik qurilmalarning qurilishi joyi bilan tanishdi.
Qayd etilishicha, tashrif yakunida investitsion loyihani bosqichma-bosqich amalga oshirish uchun taqdimotni tayyorlab topshirish, shuningdek, Feed loyihasini, shu jumladan, investitsiya loyihasini amalga oshirish uchun imtiyozli kredit shartlari bo‘yicha takliflarni o‘rganish va joriy etish bo‘yicha topshiriqlar berildi.
Avvalroq “O‘zbekneftgaz” kompaniyasi benzin importiga aksiz solig‘ini 5 foizdan 20 foizga oshirishni taklif qilgandi. Shu bilan birga, neftni qayta ishlash zavodlarining ishlab chiqarish quvvatini ta’minlash maqsadida “O‘zbekneftgaz” ayrim tayyor neft mahsulotlarining importiga solinadigan aksiz solig‘i stavkalarini qayta ko‘rib chiqishni so‘ragan.
Moliya vazirligi esa bugungi kunda ishlab chiqarilgan neft mahsulotlari va import bo‘yicha stavkalari turlicha bo‘lgan aksiz solig‘ining yagona stavkasini o‘rnatish rejalashtirilayotganini ma’lum qildi, biroq Energetika vazirligi neft mahsulotlarini import qilish bo‘yicha aksiz solig‘i stavkalarini qayta ko‘rib chiqish bo‘yicha taklif kiritmaganini bildirdi.
Monopoliyaga qarshi kurashish qo‘mitasi esa O‘zbekistonda import benzin uchun aksiz solig‘i oshirilishini maqsadga muvofiq emas deb topdi.
Izoh (0)