АҚШ Жаҳон соғлиқни сақлаш ташкилоти билан муносабатларни бутунлай тўхтатди. Бу ҳақда мамлакат президенти Дональд Трамп эълон қилган, деб ёзмоқда Reuters.
Трампнинг сўзларига кўра, ЖССТ талаб қилинган ислоҳотларни амалга ошира олмаган. АҚШ ЖССТга ҳомийлик қилиши учун ишлатилган маблағлар Вашингтон томонидан бошқа ташкилотларга йўналтирилади, дея қўшимча қилган Трамп.
АҚШ етакчисининг айтишича ташкилотни гарчи йилига 40 миллион доллар маблағ ўтказса ҳам Хитой бошқармоқда, АҚШ эса ҳар йили 450 миллион доллар маблағ ажратарди (CNBC нашридан иқтибос).
Трамп 19 май куни ЖССТъдан Хитойдан мустақил эканини исботлашни талаб қилган ва агар ташкилот тузилмавий ислоҳотларга рози бўлмаса, у ҳолда молиялаштиришни тўхтатишини айтганди.
Унинг фикрича ЖССТ COVID-19 пандемияси вақтида ўз мажбуриятларини бажармаган, шунингдек, Хитой тақдим этган коронавирус инфекцияси ҳақидаги маълумотларни текширмаган.
Эслатиб ўтамиз, 15 апрель куни АҚШ ЖССТни молиялаштиришни тўхтатишини эълон қилган. Орадан бир ҳафта ўтгач, Хитой ЖССТга қўшимча 30 миллион доллар ажратиши ҳақида хабар берилган. Кейинчалик 26 апрелда АҚШ давлат котиби Майкл Помпео эса Fox News телеканалига берган интервьюсида Америка ЖССТни молиялаштириш масаласига бошқа қайтмаслиги мумкинлигини билдирган. 17 май куни АҚШ президенти Дональд Трамп Жаҳон соғлиқни сақлаш ташкилотини молиялаштириш қисман тикланиши мумкинлигини билдирганди.
Изоҳ (0)