АҚШдаги норозилик намойишларидан кейин собиқ полициячи гумонланувчини ўлдирганликда айбланмоқда

АҚШ полицияси офицерининг гумонланувчини қўлга олиш вақтида афро-америкалик фуқаро Жорж Флойдни тиззаси билан бўғгани, яъни қотиллик юзасидан жиноий айблов эълон қилинди. Бу ҳақда CNN телеканали Ҳеннепин округи прокурори Майк Фрименга асосланиб хабар берган.

Прокурорнинг айтишича, иш юзасидан айбловлар рекорд даражадаги қисқа муддатда тақдим қилинган, бироқ тергов қилаётганларда жиноий иш юзасидан далиллар етарлича.

Флойднинг қалбаки ҳужжатлардан фойдаланганлиги гумон қилинган. Унинг ҳибсга олиниши ҳақидаги видео шу ҳафта бошида интернетда тарқалганди. Видеода полициячиларнинг эркакка кишан таққани ва уни ерга йиқитгани акс этган. Улардан бири Флойдни тиззаси билан бўйнига босиб турган. Гумонланувчи бақирган ва нафас олишга қийналган, аммо полициячилар бунга парво қилмаган. Кейинроқ Флойднинг касалхонада вафот этгани ойдинлашган. Тўрт нафар полициячи эса ишдан ҳайдалган, дейилади CNN хабарида.

Афро-америкалик фуқаронинг ўлимидан кейин АҚШнинг Миннеаполис шаҳрида оммавий норозилик намойишлари бошланди. Reuters’нинг хабар қилишича, 27 майда Флойд ҳибсга олинган жойга яқин ҳудуддаги полиция идорасида юзлаб одамлар тўпланган. Оқшомга бориб намойишчиларнинг сони мингдан ошиб кетган ва кўчаларга махсус тўсиқлар қўйилган. Оқибатда полиция кўзни ёшлантирувчи газ ва пластик ўқлардан фойдаланишга мажбур бўлди. Норозилик акцияси вақтида бир нечта идора биноси ёнган, хусусан, автоэҳтиёт қисмлари дўконида ёнғин кузатилган.

Маҳаллий полиция намойишлар вақтида камида бир нафар одам ҳалок бўлганини билдирган. Маълумотга кўра, ломбард хўжайини омма тўпланганидан фойдаланиб қолишга уринган ўғриларга қарши ўқотар қуролдан фойдаланган.

Шаҳардаги норозиликлар сабаб Миннеаполис маъмурияти ҳудудда фавқулодда ҳолат режимини эълон қилди. Ишни Федерал тергов бюроси олиб бормоқда.

АҚШ президенти Дональд Трамп воқеага муносабат билдириб, Миннеаполиснинг «ўта заиф» маъмурияти вазиятни назоратга ола билмаса, унинг ўзи ушбу ишни тўғри амалга ошириши ва у ерга Миллий гвардияни юборишини айтган. Кейинчалик шаҳарга 500 нафар аскар киритилгани маълум бўлди.