Tramp JSSTdan Xitoydan mustaqil ekanligini isbotlashini talab qildi

AQSh prezidenti Donald Tramp Jahon sog‘liqni saqlash tashkilotidan o‘z faoliyatiga o‘zgartirish kiritishni va Xitoydan mustaqil ekanligini 30 kun davomida isbotlashini talab qildi. Agarda tashkilot mazkur talablarni bajarmasa, Vashington JSSTni moliyalashtirishni butunlay to‘xtatadi. Bu haqda Trampning JSST rahbari Tedros Gebreyesusga yozgan maktubida so‘z boradi.

AQSh moliyalashtirishni to‘xtatishdan tashqari, tashkilotga a’zoligini ham bekor qiladi. “Men amerikalik soliq to‘lovchilarning dollarlarini hozirgi ahvolda Amerika manfaatlarini ifoda etmaydigan tashkilotni moliyalashtirish uchun yo‘naltirilishiga ruxsat bera olmayman”, — deb yozadi Tramp o‘zining Twitter’dagi sahifasiga.

Hujjatda ta’kidlanishicha, JSST koronavirus pandemiyasiga qarshi kurash doirasida noto‘g‘ri qadamlarni qo‘ygan, xususan, tashkilotning Xitoyga bog‘liqligi sabab infeksiya keng ko‘lamda yoyilib ketgan.

Maktubda qayd etilishicha, JSST Uxanda virus 2019-yilning dekabrida tarqalgani to‘g‘risidagi xabarlarni inobatga olmagan yoki Xitoy tomonidan rasman bildirilgan ma’lumotlarni tekshirishni boshlamagan.

Trampning ma’lum qilishicha, JSST o‘z bayonotlarida qo‘pol noaniqliklarga yo‘l qo‘ygan yoki noto‘g‘ri ma’lumotni tasdiqlagan. Xususan, 14-yanvar kuni JSST Xitoy tomonidan virus insondan insonga yuqmasligi to‘g‘risida e’lon qilingan ma’lumotlarni tasdiqlagan. Shuningdek, Tramp 21-yanvar kuni sodir bo‘layotgan voqealarni favqulodda holat, deb atamaslik uchun Xitoy raisi Si Szinpin JSSTga bosim o‘tkazgan bo‘lishi mumkinligini yozgan. Oradan bir hafta o‘tgach, ko‘plab dalil-isbotlar JSSTni bayonot berishga baribir majbur etgan.

Shunga qaramay, tashkilot bir necha bor Xitoyning harakatlarini “shaffof” ekanligini ta’kidlagan.

Eslatib o‘tamiz, 15-aprel kuni AQSh JSSTni moliyalashtirishni to‘xtatishini e’lon qilgandi. Oradan bir hafta o‘tgach, Xitoy JSSTga qo‘shimcha 30 million dollar ajratishi haqida xabar berilgan. Keyinchalik 26-aprelda AQSh davlat kotibi Maykl Pompeo esa Fox News telekanaliga bergan intervyusida Amerika JSSTni moliyalashtirish masalasiga boshqa qaytmasligi mumkinligini bildirgan. 17-may kuni AQSh prezidenti Donald Tramp Jahon sog‘liqni saqlash tashkilotini moliyalashtirish qisman tiklanishi mumkinligini ma’lum qildi.