Коронавирус келажакда мавсумий касалликка айланиши мумкин. Бу ҳақда «РИА Новости»га шифокор-педиатр, юқумли касалликлар бўйича мутахассис, вакцинолог Евгений Тимаков маълум қилди. Унинг сўзларига кўра, касаллик кеч куз ва эрта баҳорда пайдо бўлиши мумкин.
«Катта эҳтимол билан вирус грипп каби мавсумий касалликка айланади. Унинг учун қулай ҳарорат 5-10 даража бўлгани учун касаллик кеч куз ва эрта баҳорда пайдо бўлиши мумкин», — деган Тимаков.
Унинг таъкидлашича, энди аҳолида иммунитет қатламини шакллантириш керак. Тимаковнинг айтишича, Россияда коронавирусга қарши кураш бўйича чора-тадбирлар касаллик вақтини узайтиришга, соғлиқни сақлаш тизимига юкни камайтиришга, шунингдек, ўлим ҳолатларининг юқори бўлишининг олдини олишга қаратилган.
Тимаков, шунингдек, бошқа давлатлар билан таққослаганда Россияда коронавирус билан боғлиқ вазиятнинг ривожлантирилишида яхшироқ сценарий кузатилмоқда, деб ҳисоблайди. Унинг сўзларига кўра, аҳолида аста-секин иммунитет шаклланмоқда, шу билан бирга ўлим ҳолатлари кескин ошиши кузатилмаяпти.
Аввалроқ тиббиёт фанлари доктори, вирусолог, Россия соғлиқни сақлаш вазирлигининг Гамалеи номидаги Миллий эпидемиология ва микробиология маркази профессори Анатолий Альштейн SARS-CoV-2 одам танасига мослашиб олгани сабабли вируснинг инсониятдан йўқолиши эҳтимоли кам, деб баҳолаётгани хабар берилган эди.
Хитой Тиббиёт фанлари академиясининг патоген биология институти олимлари коронавирус йўқ бўлиб кетмаслиги ва у мавсумий грипп каби ҳар йили қайталанишини маълум қилганди.
ЖССТнинг фавқулодда вазиятлар дастури раҳбари Майк Райан ҳам COVID-19 коронавирусини юқтириш билан кечадиган касаллик вақт ўтган сари йўқолиб кетмай, инсоният ҳар куни тўқнаш келиши мумкин бўлган яна бир касалликка айланиши мумкинлигини айтганди.
Изоҳ (0)