Европа Иттифоқи Хитойнинг ҳаракатлари натижасида «битта мамлакат, иккита тизим» принципига ва Гонконг автономиясига путур етишидан хавотирланмоқда. Бу ҳақда Европа Иттифоқининг ташқи сиёсат ва хавфсизлик сиёсати бўйича олий комиссари Жозеп Боррелнинг ёзма баёнотида сўз борган, деб ёзмоқда «РИА Новости».
«Европа Иттифоқи Хитойнинг 28 майда бошланган, унинг халқаро мажбуриятларига (Хитой ва Буюк Британиянинг 1984 йилдаги қўшма декларацияси) ва Гонконгнинг асосий қонунига мувофиқ бўлмаган ҳаракатларидан хавотирда эканлигини билдиради. Бу ‘битта давлат, иккита тизим’ принципига ва Гонконг автономиясининг юқори даражасига жиддий путур етказади», — дейилади баёнотда.
Боррелнинг сўзларига кўра, Хитойнинг қарори унинг халқаро мажбуриятларни бажаришга бўлган интилишини шубҳа остига қўяди. Унинг қўшимча қилишича, Европа Иттифоқи бундан кейин ҳам Хитой билан мулоқотда мазкур масалани кўтаради.
Баёнот Европа Иттифоқи ташқи ишлар вазирларининг видеоконференция шаклида ўтган норасмий йиғилишидан кейин эълон қилинган. Йиғилишнинг асосий мавзуси Хитой—Европа муносабатлари бўлган.
Йиғилиш якунида Боррель журналистларга Хитой билан муаммони ечишда санкцияларни керакли усул деб ҳисобламаслигини маълум қилган.
Хитой халқ вакиллари мажлиси депутатлари 28 май куни «Гонконг махсус маъмурий ҳудудида миллий хавфсизликни таъминлаш бўйича ҳуқуқий тизим ва ҳуқуқни қўллаш механизмларини яратиш ва такомиллаштириш ҳақидаги қарор»ни қабул қилди. Мазкур қарор Хитой халқ вакиллари мажлисининг доимий қўмитасига Гонконг учун махсус миллий хавфсизлик ҳақидаги қонун лойиҳасини ишлаб чиқишни топширади. Аввалроқ South China Morning Post газетаси мазкур қонунни қабул қилиш учун Хитой халқ вакиллари мажлисининг доимий қўмитасига икки ҳафта керак бўлиши ҳақида маълум қилган, бу эса қонуннинг август ойида кучга кириши мумкинлигини билдиради.
Буюк Британия, Австралия, Канада ва АҚШ томонидан эълон қилинган қўшма баёнотга кўра, Хитой ҳукуматининг мазкур қарори Буюк Британия ва Хитой томонидан имзоланган автоном ҳудуд ҳақидаги декларация қоидаларига зид ҳисобланади. Ўз навбатида, Хитой Ташқи ишлар вазирлигининг расмий вакили Чжао Лицзянь бошқа давлатларни Гонконгнинг ишига аралашишни бас қилишга чақирган.
Аввалроқ Дональд Трамп Гонконг эркинлигини чекламоқчи бўлган Хитойга қарши кучли жавоб қайтариш билан таҳдид қилганди. Хитой эса АҚШга Гонконг ишига аралашмаслик борасида таҳдид қилди.
Изоҳ (0)