Италия Соғлиқни сақлаш олий институти президенти Сильвио Брузаферронинг маълум қилишича, куз келиши билан нафас йўллари касалликларининг тарқалиши коронавируснинг иккинчи тўлқини эҳтимолини оширади. Бу ҳақда «РИА Новости» хабар берди.
«Октябрдан юқори нафас йўлларининг касалликлари тарқалиши ошадиган мавсум бошланади. Биз тахмин қилаётган сценарийга кўра, ҳаво ва алоқа орқали юқадиган коронавирус инфекцияси кенг тарқалиши мумкин бўлган касалликка айланади ва хатолик сабабли бошқа касаллик сифатида қабул қилиниши мумкин», — дея маълум қилган Сильвио Брузаферро.
Экспертнинг сўзларига кўра, инфекциянинг юқиш тезлиги кузги мавсум яқинлашиши билан ошади.
«Иккинчи тўлқин ҳақидаги машҳур гипотеза ана шу билан боғлиқ. Илмий-техник нуқтаи назардан ҳам бу объектив маълумот ҳисобланади», — дея таъкидлаган Брузаферро.
Италия ҳукумати ҳузуридаги COVID-19 эпидемиясга қарши кураш бўйича илмий-техник қўмита аъзоси бўлган профессорнинг қайд этишича, кейинги ҳафтада Италия ҳудудлари ўртасидаги черагаларнинг очилиши мамлакат учун янги қийинчиликларни келтириб чиқаради. Унинг сўзларига кўра, бу янги касаллик ўчоқларининг пайдо бўлишига ўз вақтида бериладиган жавобни талаб қилади. Аввалроқ ҳукумат бундай ҳудудларга нисбатан «қизил ҳудуд» режимини жорий қилишга тайёр эканлигини билдирган.
Расмий маълумотларга кўра, Италияда 231 мингдан ортиқ кишида коронавирус аниқланган, 150 мингдан ортиқ бемор тузалган, қурбонларнинг умумий сони 33 142 кишини ташкил қилмоқда.
Аввалроқ ЖССТ вакили COVID-19 билан касалланиш иккинчи марта ўз чўққисига чиқиши мумкинлигини билдирди. Буюк Британия экспертлари эса карантин чекловларини тезда бекор қилиш коронавируснинг иккинчи тўлқинини юзага келтириши мумкинлигидан огоҳлантирганди. Хитойда коронавируснинг янги тўлқини қачон содир бўлиши прогноз қилинган.
Изоҳ (0)