29 май куни Юнусобод туманининг бир қатор мавзе ва маҳаллаларида электр энергияси таъминотида узилиш содир бўлди. «Тошкент шаҳар электр тармоқлари корхонаси» АЖ матбуот хизматининг маълум қилишича, туманда электр энергияси кун давомида қайта тикланади.
Маълумотларга кўра, Megaplanet кўнгилочар савдо мажмуаси ҳудудидаги 3, 12, 13, 14, 15, 16, 17-мавзелар, 18, 19-мавзеларда қисман ҳамда «Бободеҳқон», «Кулол», «Оқтепа» маҳаллаларидаги аҳоли яшаш хонадонларининг, шунингдек, тумандаги кичик саноат зонасида электр энергияси таъминотида узилиш содир бўлган.
29 май куни соат 08:21 да Юнусобод туманида пудратчи ташкилот томонидан Юнусобод туман электр таъминоти корхонаси билан келишмаган ҳолда ер қазиш ишларини олиб борган. Натижада ҳудуддаги 110/35/10 кв кучланишли ПС «Юнусобод»дан чиқувчи юқори кучланишли 10 кВли ер остидан ўтган кабел тармоқлари шикастланиши натижасида авария ҳолати юзага келган. Бунинг натижасида «Дюккер», «Парковий», «Ромашка», «Бухоро», «Обод», «Алмаз», «Колхозний», «Прогресс», «Промзона гвардейская» ва Megaplanet фидерлари кучланишсиз қолган.
Оқибатда юқорида қайд этилган Юнусобод туманидаги ҳудудларда электр энергияси таъминотида узилиш содир бўлган.
«Шу вақтнинг ўзидаёқ ‘Тошкент шаҳар электр тармоқлари корхонаси’ АЖ тизимидаги Юнусобод туман электр таъминоти корхонасининг тезкор бригадаларининг асосий куч ва техникалари юзага келган ҳолатларни зудлик билан бартараф этишга қаратилди.
Айни вақтда барча куч ва техникаларни жалб қилган ҳолда ишлар жадал олиб борилмоқда. Кун давомида босқичма-босқич электр энергиясини тиклаш ишлари якунига етказилади», — дейилади хабарда.
Изоҳ (0)