Ўзбекистон Энергетика вазирлиги Қорақалпоғистоннинг Қораўзак туманида 100 МВт қувватга эга шамол электр станциясини қуриш бўйича тендер эълон қилгани ҳақида хабар берилганди. Вазирлик матбуот хизматининг маълум қилишича, мазкур тендерда иштирок этиш учун дунёнинг 30 дан ортиқ давлатидан 70 та компания ва консорсиум ариза берган.
Ариза берганлар орасида — Саудия Арабистонининг ACWA Power, Япониянинг Marubeni, Россиянинг NovaWind («Росатом» тузилмаси), Американинг General Electric, Франциянинг Total Eren, Жанубий Кореянинг КEPCО ва БААнинг Masdar компаниялари мавжуд.
Тендер ғолиблари ушбу лойиҳа доирасида объектларни ривожлантириш, молиялаштириш, қуриш, эгалик қилиш ва улардан фойдаланишда қатнашади.
Ушбу шамол энергияси лойиҳаси бўйича биринчи тендер Европа тикланиш ва тараққиёт банкининг кўмаги билан умумий қуввати 1 гигаватт бўлган шамол электр станцияларини қуриш бўйича ҳамкорлик шартномаси доирасида амалга оширилмоқда.
Шамол электр станцияси ва тегишли инфратузилмани қуриш учун Қорақалпоғистон Республикасининг Қораўзак тумани танланган. Мазкур стратегия мамлакатда иқтисодий ўсиб бораётган электр энергияси истеъмолини қондириш учун келгуси 10 йил ичида қуввати 3 гигаватт гача бўлган шамол электр станциялари қурилишини кўзда тутади.
Эслатиб ўтамиз, 2019 йилнинг август ойида Президент қарорига асосан Бирлашган Араб Амирликларининг Masdar компанияси иштирокида Ўзбекистонда шамол электр станциялари қуриш бўйича инновацион лойиҳаларни амалга ошириш белгиланган эди. Октябрь ойида эса Бирлашган Араб Амирликлари Навоийда 100 мВт қувватли қуёш электр станциясини қуриши маълум бўлганди.
Изоҳ (0)