Ўзбекистон Президенти Шавкат Мирзиёев Андижон вилоятига сафари чоғида Марҳамат туманидаги «Водий ҳамкор агрофирмаси» томонидан ташкил этилган қуёнчилик кластери билан танишди. Бу ҳақда Президент матбуот хизмати хабар берди.
Маълум қилинишича, бир гектардан зиёд майдонда ташкил қилинган мазкур кластер 2020 йил 1 майдан ишга тушган.
Мавзуга доир: Шавкат Мирзиёев Андижон шаҳрида қурилган 7 ва 16 қаватли янги уйларни бориб кўрди (фото)
Корхонага Калифорния, Янги Зеландия, фландер, рекс ва великан зотли 1000 бош қуён олиб келинган бўлиб, бир йил давомида улар сони 30 минг бошга етиши кутилмоқда.
Қуёнчилик кластери томонидан бир йилда жами уч миллиард сўмликдан зиёд маҳсулот ишлаб чиқариш, 150 минг долларлик маҳсулотни эса экспорт қилиш режалаштирилган.
«Андижонда чорва кам, гўшт бошқа жойлардан олиб келиняпти. Қуён, парранда, балиқ кўпайтирилиб, гўшти истеъмолга чиқарилса, вилоятда гўшт нархи тушади. Камбағал оилаларга тарқатилиб, кластерлар томонидан қайта сотиб олинса, уларга даромад бўлади. Иқтисодий комплекс ва сектор раҳбарлари шу билан шуғулланиши керак», — деди Шавкат Мирзиёев.
Вилоятда омихта ем ишлаб чиқаришни кўпайтириш, қуёнчиликни бир миллион бошга етказиш бўйича топшириқлар берилди.
Изоҳ (0)