Шавкат Мирзиёев 12 май куни Ўзбекистон банк тизимини ислоҳ қилиш стратегиясини имзолаган, унда давлат улуши бўлган банкларни хусусийлаштириш кўзда тутилганди. Марказий банк ҳозирги кунда шундоқ ҳам хусусий банкларнинг сони давлат банклариникидан кўпроқ бўлишига қарамай хусусийлаштиришдан қандай зарурият борлигини тушунтирди.
Марказий банкнинг қайд этишича, хусусий банклар сон жиҳатдан кўп бўлса ҳам, айни вақтда хусусий банкларнинг (давлат улуши иштирок этмаган) банк хизматлари бозоридаги улуши бор йўғи 15 фоизни ташкил этади. Банк тизимида давлат улушининг юқори миқдорда сақлаб қолиниши ушбу тизимнинг умумий ривожланишига ҳамда самарадорлигига салбий таъсир кўрсатади.
Давлат иштирокидаги банкларнинг халқаро молия институтлари кўмагида трансформация қилиниши ва хорижий стратегик инвесторларга сотилиши натижасида:
- биринчидан, банкларда корпоратив бошқарув ва риск-менежмент тизимлари такомиллашади;
- иккинчидан, банк тизимига янги технологик ечимлар ва банк ишининг илғор хорижий тажрибаси кириб келади, банкларнинг бизнес-моделлари ўзгариб, уларнинг мижозларга йўналтирилганлик даражаси ошади.
«Истиқболда хизматларнинг сифати яхшиланади, нархлари арзонлашади, маҳсулот ва хизматларнинг янги турлари пайдо бўлади, масофавий банк хизматлари кўлами кенгайиб боради, аҳоли ва тадбиркорлар учун қулай шароитлар яратилади», — дейилади хабарда.
Эслатиб ўтамиз, аввалроқ Ўзбекистонда 0,01 фоиздан 100 фоизгача давлат улуши бўлган 1115 та компания тўлиқ хусусийлаштирилиши кўзда тутилган Президент қарори лойиҳаси эълон қилинган, ҳужжат муҳокамаси 12 март куни якунланганди. Хусусийлаштириладиган компаниялар орасида бозорлар, футбол клублари, банклар ҳам бор эди.
Давлат активларини бошқариш агентлиги департмент бошлиғи Исмат Нусуров 13 март куни корхоналарнинг давлат тасарруфидан чиқарилиши масаласи бўйича журналистларга изоҳ бериб, қарор ҳар йили маҳсулот бозори ва конъюнктурадаги ўзгаришлардан келиб чиққан ҳолда қайтадан кўриб чиқилиши, бу йил давлат иштироки зарур корхоналарда кейинги йил ҳолат ўзгариши мумкинлигини таъкидлаб, шу сабабли корхоналар рўйхати ҳар йили қайта кўриб чиқилишини билдирганди.
Изоҳ (0)