Сурхондарё вилоятининг Қумқўрғон туманида 16 май куни одам ўлими билан якунланган йўл-транспорт ҳодисаси содир бўлди. Бу ҳақда ЙҲХББ хабар бермоқда.
Ҳодиса соат 19:00 ларда «Хўжақишлоқ» маҳалласи ҳудудидан ўтган 4Р-101 автомобиль йўлининг 24-километрида юз берган. 1989 йилда туғилган А.И. ўз бошқарувидаги «Камаз» юк машинасини ортга буриб олиш мақсадида орқага ҳаракатланиб, орқа томонида йўлнинг ўнг четида турган пиёдани уриб юбориб, ЙТҲ содир этган.
ЙТҲ оқибатида пиёда 1955 йилда туғилган Б.Қ. исмли аёл оғир тан жароҳатлари олиб воқеа жойида вафот этган.
Мазкур ЙТҲ юзасидан Қумқўрғон тумани ИИБ ТБ томонидан суриштирув ишлари олиб борилмоқда.
Шунга ўхшаш йўл-транспорт ҳодисаси 14 май куни Қашқадарё вилоятида содир бўлганди. Қарши туманида «заправка»дан орқаси билан ҳаракатланган фургон 25 ёшли йигитнинг умрига зомин бўлганди.
Қумқўрғон туманида 3 май куни юз берган ЙТҲ ҳам одам ўлими билан якунланганди. Captiva билан тўқнашган трактор бир неча бўлакка бўлиниб кетган, трактор йўловчиси 13 ёшли бола 7 май куни шифохонада вафот этганди.
Изоҳ (0)