Калифорниядаги савдо марказининг автотураргоҳида машина ўғриси ноодатий тарзда қўлга олинди. Машина эгаси ўзининг Tesla Моdel 3’ида ўтирганида Чарли Смит исмли эркак электрокар эшигини очиб, унга салондан тушишни буюрган. Tesla эгаси қаршилик кўрсатмаган, бироқ машина жойидан қўзғалгач, у электродвигателни ўчириб қўйган ва машина эшикларини қулфлаган, деб хабар беради Motor.
Tesla эгаси буни электрокарни масофадан туриб бошқариш имконини берадиган мобил илова орқали амалга оширган. Полиция воқеа жойига етиб келиб, салон ичидан чиқишга уринаётган ўғрини қўлга олган. Аниқланишича, эркак маст ҳолда бўлган. Жиноятчига машина ўғирлашга уриниш айблови қўйилган ва у ҳибсга олинган.
Tesla мобил иловаси электродвигателни ишини бошқариш ва эшикларни қулфлаб қўйишдан ташқари смартфон ёрдамида автомобилни геолокация орқали аниқлаш, реал вақтда қувват миқдорини текшириш, шунингдек, Tesla ўз эгасининг олдига келиши учун автопилотни ёқиш каби функцияларга эга.
Tesla Model 3 2016 йилда тақдим этилган бўлиб, марканинг илк седани ҳисобланади. Электромобилга 258-462 от кучига эга электродвигатель ўрнатиш мумкин. Машина 100 км/соатга 3,5 сонияда чиқа олади, максимал тезлиги 260 км/соат. Мodel’нинг ўртача нархи 63 минг долларга тенг.
Изоҳ (0)