«Ленинград» кабриолети тасодифан олинган сурат ёрдамида қайта тикланди

Америкалик Жон Шульц томонидан 1958 йилда олинган сурат ёрдамида «Ленинград» кабриолети қайта тикланди, деб хабар беради Autorambler.

Ленинграднинг (Санкт-Петербург) Герцен кўчасида олинган суратдан кўриш мумкинки, кабриолет кўпчиликнинг эътиборини ўзга тортган. Бироқ Шульцнинг сурати бўлмаганида мазкур кабриолет совет автомобиль саноатининг бошқа кўплаб маҳсулотлари каби ном-нишонсиз йўқолиб кетиши мумкин эди.

Икки ўриндиқли «Ленинград» кабриолети 1956 йилда муҳандис Аркадий Бабич томонидан йиғилган. Муҳандис уни яратишга қарийб 3 йил умрини сарфлаган.

Машина ўз даврининг автомобиль саноатидаги энг яхши намуналар даражасида яратилган бўлиб, қанотларга эга кенг кузов, кўзни қамаштирувчи хромланган деталлар ва капотидаги катта «Ленинград» ёзуви билан безатилган.

1959 йили Бабич ўзининг спорт автомобили ёрдамида Симферополдан Ленинградга қадар бўлган 2125 километр масофани 20 соатда босиб ўтган.

Машинага «ГАЗ-12 ЗИМ» седанининг агрегатлари ва узеллари ўрнатилган. У 90 от кучига эга 3,5 литрли олти цилиндрга эга двигатель ёрдамида ҳаракатга келади ва уч поғонали механик узатмалар қутиси ёрдамида бошқарилади.

Кабриолетнинг тақдири ҳақида ҳозиргача ҳеч нарса маълум эмас. Бир неча йил олдин у ачинарли аҳволда сотувга қўйилган эди. Moтoрсиз ва чириган кузовли «Ленинград»ни латвиялик автомобиль ишқибозлари харид қилган бўлиб, уни тўлиқ қайта тиклашга муваффақ бўлган. Машинани реставрация қилишда Шульцнинг рангли сурати намунасидан фойдаланилган.