Республика махсус комиссияси қарорига кўра, 18 майдан бошлаб шахсий автомобилларнинг ҳаракати бўйича чекловлар босқичма-босқич бекор қилинади.

Фото: «Дарё»

Қарорга кўра, ҳудудлар бўйича қуйидаги тартиб жорий этилади:

«Яшил» тоифадаги ҳудудларда — Республика махсус комиссияси йиғилишининг 2020 йил 6 майдаги 21-сон баёни билан автотранспорт воситаларининг махсус рухсатномасиз (стикерсиз) ҳаракатланишига рухсат берилган;

«Сариқ» тоифадаги ҳудудларда — соат 06:00 дан 22:00 га қадар бўлган вақт оралиғида автотранспорт воситаларининг махсус рухсатномасиз (стикерсиз) ҳаракатланишига рухсат берилди. Бунда автотранспорт воситаларининг салонида 4 кишидан ортиқ бўлмаслиги лозим.

«Қизил» тоифадаги ҳудудларда — автотранспорт воситаларининг махсус рухсатномасиз (стикерсиз) ҳаракатланишига фақатгина куннинг муайян вақтида (07:00 дан 10:00 гача, 17:00 дан 20:00 гача) фуқароларнинг иш жойига бориб-келиши, тиббий буюмлар, дори воситалари, озиқ-овқат ва биринчи галдаги маҳсулотларни харид қилиш учун ҳаракатланишига рухсат берилади.

Бундан ташқари, 18 майдан бошлаб Тошкент шаҳридан Нукус, Урганч, Термиз шаҳарларига авиақатновлар (бориш ва қайтиш) тикланади. Шунингдек, Тошкент шаҳридан Навоий, Бухоро, Қарши шаҳарларига «Афросиёб» тезюрар поезди ҳамда Фарғона водийсига темир йўл қатнови (бориш ва қайтиш) қайта йўлга қўйилади.

Шу билан бирга, авиа ва темир йўл қатновларини ташкил этишда барча карантин қоидаларига амал қилиш, шу жумладан, йўловчилар сонини камайтириш, дезинфекция қилиш ва бошқа санитария талаблари сўзсиз бажарилиши талаб этилади.

Эслатиб ўтамиз, Ўзбекистонда вилоятлар, туман ва шаҳарлар коронавирус хавфи даражасига қараб «қизил», «сариқ» ва «яшил» ҳудудларга ажратилган. Аввалроқ эълон қилинган рўйхатда Тошкент шаҳри ва унинг барча туманлари «сариқ» ҳудудлар қаторига кирганди.

Ўзбекистонда 14 май соат 23:00 ҳолатига кўра, коронавирус инфекциясини юқтириб олганлар сони 2645 нафарни ташкил этмоқда. Мамлакатда 2136 нафар фуқаро коронавирус инфекциясидан бутунлай соғайган бўлиб, инфекция асоратлари оқибатида 11 киши вафот этган.