«Навоий» эркин иқтисодий зонасида Эрон билан ҳамкорликда Navoiy Motors қўшма корхонаси фаолияти йўлга қўйилмоқда. Қиймати 12 миллион долларга тенг ушбу лойиҳа, ЎзАнинг қайд этишича, Ўзбекистон «автомобилсозлик саноатида туб бурилиш ясаши кутилмоқда».
Корхона бош технологи Афшин Шокирийнинг сўзларига кўра, бу ерда Хитойнинг Oshan бренди остида дастлаб ички бозор йўлтанламас, пикап, минивен каби кузовли автомобиллар йиғиш йўлга қўйилади. Корхона йилига 30 минг дона автомобиль ишлаб чиқариш қувватига эга бўлади.
Афшин Шокирийнинг қайд этишича, автозавод 2020 йил охиригача ишга тушиши режалаштирилган. Ҳозирда корхона қурилиши доирасида цемент, ўлчов, тупроқ ишлари олиб борилаяпти, иш карантин талаблари асосида ташкил этилган.
Oshan қандай бренд?
Интернет Хитой Oshan автомобиль бренди бўйича сўров берилса, фақат Changan автомобилсозлик компаниясининг Oushan (Ossan) ва Oushang бренди остидаги автомобиллари чиқиб келади. Ҳар иккала бренд остида йўлтанламас ва минивенлар бор.Жумладан, Oushan бренди остида COS1°, COS1° GT, Х7 йўлтанламаслари, Cosmos минивени ишлаб чиқарилади.
Oushang бренди остида эса Х70А, CХ70 йўлтанламаслари, А600, А800 минивенлари ишлаб чиқарилган.
Ўзбекистонда ушбу моделларнинг айнан қай бири ишлаб чиқарилиши кўзда тутилгани номаълум.
Ўзбекистонда ишга тушиши айтилган бошқа автозаводлар
Сўнгги тўрт йилда Ўзбекистонда автозавод қуриш истагини билдирган компаниялар сони кўпчиликни ташкил этади. Хусусан, Changan компанияси билан боғлиқ хабарлар бир неча пайдо бўлган. 2018 йил июнида компания вакиллари Фарғона водийсида электромобиллар йиғишни йўлга қўймоқчи экани, 2019 йил майида эса Жиззах вилоятида автозавод қуриш масаласида вилоят ҳокимлиги билан музокаралар ўтказгани ҳақида хабарлар тарқалган эди.«Жиззах» эркин иқтисодий зонасида эса 2019 йилдан Peugeot Expert ва Peugeot Boxer ишлаб чиқарилиши керак эди, бироқ кейинчалик ушбу лойиҳа тўхтатилгани, қуриб бўлинган заводда Volkswagen компанияси билан имзоланган келишув доирасида 2020 йилдан йилига 20 минг дона Volkswagen Caddy автомобилини ишлаб чиқариши маълум қилинди.
Бундан ташқари, «Қўқон» эркин иқтисодий зонасида 2022 йилдан Хитойнинг Silk Road Company компанияси билан ҳамкорликда нархи тахминан 3 минг доллар, ташқи кўриниши Mercedes AMG’ни эслатадиган электромобиллар, 2023 йилдан эса Hyundai компанияси билан ҳамкорликда Ioniq ва Hyundai Kona электромобиль ишлаб чиқарилиши бошланиши керак.
Hyundai томонидан водийнинг бошқа вилояти — Наманганда тижорат автомобиллари ва автобуслар ишлаб чиқариш бўйича автозавод қуриш лойиҳаси ҳам амалга оширилаётгани, корхона 2020 йил биринчи чорагида илк маҳсулотни тақдим этиши айтилган. Попда эса 2019 йил сентябридан UzFoton бренди остида микроавтобуслар чиқиши керак эди.
2019 йил сентябрида Хитойнинг Hebei Good Hope Logistics Development компанияси Ангренда электромобиллар ишлаб чиқарувчи лойиҳани ишга тушириши маълум бўлганди. Шунингдек, Fiat Chrysler, Henan Suda компаниялари ҳам Ўзбекистонда автомобиль ишлаб чиқаришга қизиқиш билдиргани ҳақида хабарлар тарқалган.
Изоҳ (0)