Қашқадарё вилоятининг Касби тумани 13 май куни соат 12:30 ларда одам ўлими билан якунланган йўл-транспорт ҳодисаси содир бўлди. Бу ҳақда ЙҲХББ хабар бермоқда.
Ҳодиса Назартепа қишлоғидан ўтувчи 4К-278 Бешкент—Денов автомобиль йўлининг 12-километрида юз берган. 1984 йилда туғилган А.Т. (эркак) Nexia автомобили тезлигини меъёридан оширган ҳолда бошқариб кетаётганда ёмғир ёғганлиги сабабли йўлнинг хавфли бурилиш қисмида машина сирпаниб кетган. Ҳайдовчи руль бошқарувини йўқотган ва машина йўл четидаги дарахтга урилган.
Оқибатда транспорт воситаси салони олди ўриндиғида ўтирган йўловчи 1963 йилда туғилган А.Т. (эркак) оғир тан жароҳатлари олиб воқеа жойида вафот этган.
Мазкур ЙТҲ юзасидан Касби тумани ИИБ ТБ томонидан суриштирув ҳаракатлари олиб борилмоқда.
Аввалроқ Сурхондарё вилоятининг Бойсун туманидаги йўлнинг хавфли бурилиш қисмида бир ҳафта фарқи билан иккита юк машинаси бетон тўсиққа урилгани ва ҳайдовчилар вафот этгани хабар қилинганди.
Жорий ҳафта мобайнида Ўзбекистонда одам ўлими билан якунланган бир нечта ЙТҲ содир бўлди. 11 май куни Сурхондарёнинг Шўрчи туманида Lacetti мотороллерга урилиши оқибатида 38 ёшли мотороллер ҳайдовчиси, Тошкент вилоятининг Чиноз туманида Isuzu автобуси велосипедчини уриб юбориши оқибатида 33 ёшли велосипедчи, 12 май куни Бухоронинг Ромитан туманида трактор тиркамаси ағдарилиб кетиши оқибатида 33, 34 ва 38 ёшли аёллар, Хоразмнинг Янгибозор туманида Matiz уриб юбориши оқибатида 4 ёшли бола, 13 май куни Андижоннинг Булоқбоши туманида «Камаз» уриб юбориши оқибатида 30 ёшли велосипедчи вафот этди.
Изоҳ (0)