Коронавирус инфекциясини юқтириб олган беморларда касалликнинг енгил шакли оғир шаклига ўтиши учун бир суткадан камроқ вақт кетиши мумкин. Бу ҳақда Россия президенти ишлари бошқармасининг юқумли касалликлар бўйича штатдан ташқари бош мутахассиси, Марказий клиник касалхона юқумли касалликлар маркази раҳбари Георгий Сапроновга таяниб, «РИА Новости» хабар берди.
«Агар эрталаб бемор ўзини яхши ҳис қилаётган бўлса, кечга бориб у реанимацияда ётиши мумкин. Албатта, бунга шифокорларнинг аксарияти тайёр эмас. Бу каби шиддат ҳайратланарли», — дейди Сапронов.
Унинг қўшимча қилишича, бу каби вазиятда шифокорлар беморни кузатиш муҳим аҳамиятга эга, деб ҳисоблайди.
Аввалроқ педиатр шифокор, инфекционист, вакцинолог Евгений Тимаков ҳар қандай вирусли инфекция, хусусан, COVID-19 ҳам бронхиал астмадан азият чекадиган инсонларда оғир кечишини маълум қилганди. Вакцинологнинг сўзларига кўра, астма билан оғриган беморлар коронавирус пандемияси вақтида ўз соғлиғига эҳтиёт бўлиши керак.
13 май ҳолатига кўра, Россияда пандемия бошланганидан буён COVID-19 билан касалланганлар сони 242 минг кишидан, вирус қурбонлари сони эса 2,2 минг кишидан ошган. Мамлакатда ҳозирга қадар коронавирусдан даволанишга муваффақ бўлганлар сони 48 минг кишидан ошди. Россия коронавирусга чалинганлар сони бўйича дунёда иккинчи ўринда турибди.
Изоҳ (0)