Туркманистонда Лебоп вилоятидаги бўрон оқибатида электр таъминотидан узилиб қолган қишлоқлардан биридаги аҳоли трансформатор учун пул йиғишни бошлади, деб хабар берган «Хроника Туркменистана».
Жайҳун-Чаржов туманидаги Балиқчи қишлоғи 27 апрелдан буён электр токи таъминотидан узилиб қолган. Қишлоқ оқсоқолларининг туман ҳокимлигига қилган мурожаатлари жавобсиз қолган. Амалдорлар марказдан трансформатор юборилса, электр таъминоти тикланишини маълум қилган, бироқ бунинг қачон амалга ошиши очиқланмаган.
Қишлоқ аҳолиси ҳар бир хонадондан 200 манатдан пул йиғиб, туман электр таъминоти идорасидан ёрдам сўраган ва мутасаддилар трансформатор борасида кўмак берилишини маълум қилган. Одамлар трансформатордан ташқари симёғочлар ва симлар учун ҳам маблағ йиғиши керак.
Электриклар мусибатдан фойдаланиб, узилган электр узатиш тармоқларидаги симларнинг метрини 2,50 манатдан пуллаш билан овора. Калинин ва Арабчи қишлоқларида яшовчи фуқаролар ҳам уйларига электр токи қайтиши учун ўз ёнларидан маблағ йиғишга мажбур бўлган.
27 апрелда Лебоп вилоятида кучли бўрон кузатилган. Табиий офат оқибатида вилоят ичимлик суви ва электр таъминотида муаммолар пайдо бўлган.
Изоҳ (0)