Хитойдан инсонпарварлик ёрдами билан 13 май куни Кипр томон учган самолёт йўналишини Москва томон ўзгартиришга мажбур бўлди, сабаби Туркия уни ўз ҳудудидан ўтказишни рад этган. Бу ҳақда Кипр янгиликлар агентлиги (CNА) мамлакат транспорт вазири Яннис Карусосга таяниб хабар қилган.
Вазирнинг сўзларига кўра, Анқара ўз ҳудудидан учишни тақиқлаганидан кейин лайнер экипажи Кипрга етиб олиш учун Туркияни айланиб ўтишга ёқилғи етмаслигини тахмин қилиб, йўналишни ўзгартирган.
«Учувчи парвоз йўналишини ўзгартирган ва Москва аэропорти томон уча бошлаган. Мақсад у ердан керакли ёқилғини қуйиб олиш бўлган», — дея Карусос сўзларини келтиради CNА.
Вазир Кипр ТИВ ушбу вазиятдан хабардор экани ва демарш тақдим этилишини маълум қилган.
Аввал Кипр транспорт вазирлиги махсус юк лайнерида COVID-19 коронавирус инфекциясига қарши курашда ишлатиш учун Хитойдан 36 тонна тиббиёт буюмлари – ҳимоя кийимлари, бахилалар, бир марталик жарроҳлик кийимлари ва ҳимоя ниқоблари етиб келиши ҳақида хабар қилган. Самолёт Тяньцзинь шаҳри яқинидаги Биньхай аэропортидан учган ва Ларнакига 13 май куни Тошкент вақти билан соат 15:30 да қўниши лозим эди.
Изоҳ (0)