The New York Times газетаси Россияда коронавирус қурбонлари сони камайтириб кўрсатилаётгани тўғрисидаги маълумотлар келтирилган мақола мазмунига шубҳа қилинишига ҳеч қандай асос кўрмаганини маълум қилди. Бу ҳақда NYT коммуникация бўйича вице-президенти Даниэль Роудсга таяниб, «ТАСС» хабар берди.
Унинг сўзларига кўра, нашр ўз материалида келтирилган маълумотларнинг аниқлигига тўлиқ ишонади. Роудснинг таъкидлашича, мақола расмий давлат идоралари томонидан эълон қилинган маълумотларга, шунингдек, бир неча давлат институтлари экспертлари билан ўтказилган интервьюларга асосланган. «Мақоламизда келтирилган бирор-бир факт баҳслашиладиган эмас», — дейди у.
NYT Москва ва Россиянинг бошқа ҳудудларида коронавирус оқибатида вафот этаётганлар сони расмий статистикадан кўп бўлиши мумкинлиги ҳақида мақола чоп этган. Хусусан, газета мустақил демограф Алексей Рашкиннинг сўзларини келтириб ўтган. Рашкин Москвада коронавирус қурбонларининг қарийб 70 фоизи рўйхатга олинмаётгани, Россиянинг бошқа минтақаларида ушбу кўрсаткич 80 фоизга тенглигини маълум қилган.
Шунингдек, мақолада Россия президенти ҳузуридаги Халқ хўжалиги ва давлат бошқаруви академияси катта илмий ходими Татьяна Михайлованинг баёноти келтирилган бўлиб, унда Москвада апрель ойида ўлим кўрсаткичлари ўтган ўн йилликда кузатилган ўлим ҳолатларидан анча юқори эканлиги қайд этилган. «Бир нарса аниқ: коронавирус қурбонлари сони расмий маълумотлардан қарийб уч баробарга кўп бўлиши мумкин», — дейди Михайлова.
Financial Times газетасида ҳам худди шу каби мақола чоп этилган. Материалда Москва ва Санкт-Петербургда коронавирус қурбонлари аслида анча кўп эканлигига урғу берилган. Нашр версиясига кўра, ушбу шаҳарларда 2020 йилнинг апрель ойи бўйича ўлим ҳолати ўтган беш йилнинг айнан шу ойига нисбатан 2073 тага ортган. Расмий маълумотларга кўра, апрелда COVID-19 оқибатида 629 киши вафот этган, 1444 та ўлим ҳолати эса ҳисобга олинмай қолиб кетган.
Маълумот учун, 13 май ҳолатига кўра, Россияда пандемия бошланганидан буён COVID-19 билан касалланганлар сони 242 минг кишидан, вирус қурбонлари сони эса 2,2 минг кишидан ошган.
Изоҳ (0)