Россияда илк бор 100 ёшли аёл коронавирусдан соғайди, деб хабар бермоқда «Интерфакс» Россия Федерал биотиббий агентлиги (ФБТА)га таяниб.
Қайд этилишича, касалланган аёл Пелагея Пояркова 13 май — ўзининг туғилган кунида вирусдан тузалган ва касалхонадан чиққан.
Аёл москвалик бўлиб, касалхонада режали даволанаётган бўлган. Унинг палатадошида коронавирус аниқланган ва унга ҳам вирус юққан. Шундан сўнг тегишли аломатлар ва тасдиқланган таҳлил натижалари билан ФБТАнинг Мия ва нейротехнология марказига ётқизилган ва шу ерда даволанган.
Аввалроқ 104 ёшли италиялик аёл коронавирусдан тузалгани, 107 ёшли нидерландиялик аёл коронавирусдан тузалган энг кекса бемор бўлгани хабар берилган эди. Шунингдек, Бразилияда 99 ёшли уруш фахрийси ҳам коронавирусдан тузалган.
Сўнгги маълумотларга кўра, Россияда COVID-19 пандемияси бошланганидан буён касалланганлар сони 242 271 кишига етди. Мамлакатда ҳозирга қадар коронавирусдан даволанишга муваффақ бўлганлар сони 48 минг кишидан ошди. Россия коронавирусга чалинганлар сони бўйича дунёда иккинчи ўринда турибди.
Изоҳ (0)