Россия президентининг матбуот котиби Дмитрий Песковга икки томонлама пневмония ташхиси қўйилди. Бу ҳақда Песков «Коммерсантъ» нашрига берган интервьюсида маълум қилган.
Песковнинг сўзларига кўра, унда коронавирус инфекцияси деярли ҳар кунги режимда ўтказиладиган тестлардан бирининг натижаси орқали аниқланган.
«Тестдан кейинги биринчи кун ҳеч қанақа касаллик белгилари кузатилмади, кейинроқ тана ҳароратим 37 даражадан бироз кўтарилди», — дейди Песков. Президент матбуот котиби икки-уч кун уйда ётганидан кейингина шифохонага борганига аниқлик киритган.
«Бугунги кунда пневмония билан касалланганлар ҳам уйда даволаняпти, масалан, бир томонлама бўлса… Икки томонлама бўлганда эса танлов йўқ. Бу ерда яна бир муҳим жиҳат шундаки, сенинг ўпкангни вирус каби организминг ҳам емиришни бошлайди», — дейди Песков.
Россия президентининг матбуот котиби коронавирусга чалингани ва у айни пайтда касалхонада даволанаётгани ҳақида 12 май куни маълум бўлганди. У рафиқаси Татьяна Навка билан бирга касалхонага ётқизилган. Сўнгги марта Дмитрий Песков 30 апрелда Владимир Путин раислигида бўлиб ўтган йиғилишда оммага кўриниш берган.
Дмитрий Песков Россияда ҳукуматининг коронавирусга чалинган бешинчи аъзоси бўлди. Ўзининг коронавирусга чалингани ҳақида биринчи бўлиб 30 апрель куни Россия бош вазири Михаил Мишустин маълум қилганди. У касалхонага ётқизилгач, ҳукумат раҳбари ваколатлари бош вазирнинг биринчи ўринбосари Андрей Белоусовга юклатилган. 1 май куни эса Россия қурилиш вазири Владимир Якушев ва унинг ўринбосари Дмитрий Волковнинг коронавирусга чалингани маълум бўлганди. 6 май куни эса Россия маданият вазири Олга Любимованинг коронавирусга чалингани маълум қилинди.
Изоҳ (0)