Кейинги пандемиянинг эҳтимолий сабаби Амазониядаги вирус бўлиши мумкинлиги маълум қилинди

Амазониянинг ёмғирли ўрмонларида яшовчи ҳайвонларни зарарлайдиган вирус одамга юққанидан кейин навбатдаги пандемия бошланиши мумкин. Бу ҳақда бразилиялик эколог Давид Лапола AFP’га маълум қилди.

Унинг сўзларига кўра, жунгли ўрмонларини кесган сари одамлар ёввойи ўрмонларга тобора чуқурроқ кириб бормоқда, бу эса вируснинг одамга юқиш хавфини оширади.

«Амазония — вирусларнинг улкан манбаи. Яхшиси, биз у ерда омадимизни синаб кўрмаганимиз маъқул», — дея огоҳлантирган Лапола.

Унинг айтишича, Бразилия, Перу, Колумбия, Венесуэла, Эквадор, Боливия, Гаяна, Суринама ва Француз Гвианаси ҳудудларининг маълум қисмларини ўз ичига оладиган Амазония минтақаси ўрмонларини ваҳшийларча кесишда давом этиш ҳайвонлардан одамларга юқадиган вирусларнинг тарқалишига олиб келиши мумкин. Шу кунга қадар бундай ҳолатлар, асосан, Африка ва Жанубий Осиёда қайд этилган.

Асосий талқинга кўра, уларнинг энг сўнггиси COVID-19 коронавирус инфекциясининг пандемияси бўлди. Жаҳон соғлиқни сақлаш ташкилоти маълумотларига кўра, SARS-CoV-2 вируси одамларга ҳайвонлардан ўтган, бироқ айнан қандай ҳайвондан ўтгани ҳозирча номаълум. Вируснинг эҳтимолий ташувчиси сифатида кўршапалаклар, панголинлар ва бошқа ҳайвонлар кўрсатилди.

Унинг қайд этишича, бу Амазониядан ҳозиргидек норационал фойдаланмаслик учун яна бир сабаб ҳисобланади. Экологнинг сўзларига кўра, Амазонияни хўжалик учун ўзлаштириш принципларини қайта кўриб чиқиш керак, акс ҳолда дунёга касалликлар тўлқинлари хавф солади, уларнинг оқибатларини эса олдиндан айтиб бўлмайди.

Жонс Ҳопкинс университети маълумотларига кўра, дунёда коронавирусга чалинганлар сони 4,3 миллион кишидан ошди, қарийб 300 минг киши касаллик оқибатида вафот этди. Аввалроқ Moody’s агентлиги COVID-19 тарқалишини «испан гриппи» пандемияси билан таққослаган. Мазкур пандемиядан 1918—1919 йилларда 500 миллион одам зарарланган, унинг қурбонлари сони 50-100 миллион киши деб баҳоланади.