Жанубий Кореяда сўнгги суткада коронавирусга чалинганлар сони 29 кишига ошиб, касалланганларнинг умумий сони 10 991 кишига етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб. Эпидемия бошланганидан буён 9 762 киши тузалди, 260 нафари вафот этди.
Аввалроқ 258 киши вафот этгани ҳақида хабар берилган эди. Янги касалланиш ҳолатлари кўпайишига коронавирус борлиги гумон қилинган ва кейинчалик тасдиқланган 29 ёшли йигитнинг 2 майга ўтар кечаси Кёнгидо провинциясидаги Йонъин шаҳридан Сеулнинг одам гавжум бўлган Итхэвон ҳудудига боргани ва у ерда бир нечта клуб ва барларга киргани сабаб бўлган.
Клублардаги бошқа шаҳарлардан дам олгани келган бир қатор шахслар ҳам вирус юқтириб олган. Айни пайтда клубда бўлганлар ёки уларнинг яқинларининг 131 нафарида вирус аниқланган.
Жанубий Корея 6 майдан бошлаб фақат эҳтиёткорлик ва профилактика чораларига риоя қилишни кўзда тутувчи «кундалик ҳаётдаги карантин» режимига ўтиб, мактаб ва жамоат муассасалари одатий фаолиятига қайта бошлаганди. Касалланганлар сони яна ортиши кутилаётгани сабабли ҳукумат бу жараённи 1 ҳафтага кечиктирди. Барча клублар ва кўнгилочар жойларни 7 июнга қадар ёпиш тўғрисидаги тавсия билан чиқди, Сеул маъмурияти эса бундай муассасаларни мажбурий равишда ёпиш тўғрисида буйруқ чиқарди.
Сеул администрацияси 24 апрелдан 6 майгача Итхэвондаги клубларга ташриф буюрган 5 517 ортиқ кишидан иборат рўйхатни тайёрлаб, ҳозирда уларнинг 2 400 дан ортиғи билан алоқа ўрнатган. Қолганлари билан ҳам алоқа ўрнатишга ҳаракат қилинмоқда.
Шунингдек, қайд этилишича, коронавирусга чалинганлар Йонъин шаҳридан бўлган 29 ёшли йигит ташриф буюрмаган клубларда ҳам аниқланган. Уларнинг айримларида кунлик ташриф буюрувчилар сони 1 500 кишидан ошади. Шундан келиб чиқиб ҳукумат уларга номаълум бўлган вирус ўчоқлари борлигини тахмин қилмоқда.
Мамлакатда сўнгги суткада 1 киши вафот этди, 39 нафар бемор соғайди. Шунингдек, камида 429 кишининг организмида улар тузалганидан кейин ҳам вирус сақланиб қолгани қайд этилган.
Дунё бўйлаб эса коронавирусга чалинганлар сони 4 миллион кишидан ошиб кетди
Изоҳ (0)