Таиландда 9 мартдан буён биринчи марта бир сутка давомида коронавирус билан касалланиш бўйича бирорта ҳам ҳолат қайд этилмади. Бу ҳақда «ТАСС» хабар берди.
Таиланд Соғлиқни сақлаш вазирлиги томонидан маълум қилинишича, 13 май ҳолатига кўра, мамлакатда коронавирусга чалинганлар сони 3017 нафарни ташкил этмоқда.
Қиролликнинг коронавирусга қарши кураш маркази матбуот котиби ҳали пандемия тугамагани сабабли аҳолини хотиржамликка берилмасликка ҳамда белгиланган қоидаларга амал қилишга чақирган. Унинг қайд этишича, касалланиш билан боғлиқ кўплаб янги ҳолатлар аввал касалланганлар билан боғлиқ. Бундан ташқари, хориждан қайтган кўплаб фуқаролар карантинда турибди.
Таъкидланишича, сўнгги бир суткада коронавирус билан боғлиқ ўлим ҳам қайд этилмаган. Таиландда коронавирус оқибатида жами 56 киши вафот этган. Сўнгги бир суткада 46 киши касалликдан тузалган. Тузалганларнинг умумий сони 2844 кишига етган. Касалхоналарда айни пайтда 117 киши даволанмоқда.
Таиландда коронавирусга чалиниш бўйича биринчи ҳолат 13 январда аниқланган. 22 март куни мазкур мамлакатда касалланиш бўйича энг юқори кўрсаткич қайд этилган — 188 кишида коронавирус аниқланган. Мамлакат ҳудудида 3 апрелдан буён соат 22:00 дан 04:00 гача комендантлик соати жорий қилинган. Мазкур режимни бузганлар икки йилгача қамалиши ва (ёки) 1200 доллар миқдорида жаримага тортилиши мумкин.
Аввалроқ Вьетнамда бир ҳафта ичида ҳеч ким коронавирусга чалинмагани учун карантин режими бекор қилинганди. Мазкур мамлакатнинг йирик шаҳарларида кафелар ва дўконларнинг фаолият юритишига рухсат берилган, мактаблар очилган, жамоат транспорти ўз ишини қайта тиклаган.
Изоҳ (0)