UzAuto Motors компанияси томонидан жиҳозланган Damas негизидаги тез тиббий ёрдам автомобиллари партияси Тожикистонга юборилди. Бу ҳақда компания матбуот хизмати хабар берди.
Таъкидланишича, автомобиллар махсус тез тиббий ёрдам паркини кенгайтириш ва пандемия вақтида беморларга ўз вақтида ёрдам кўрсатиш учун мўлжалланган.
Ҳар бир транспорт воситаси тиббий ходимлар учун қўшимча шахсий ҳимоя воситалари билан жиҳозланган. Кейинчалик тиббий муассасалар орасида тарқатиш учун автомобиллар Тожикистон Соғлиқни сақлаш вазирлигига топширилган.
Аввалроқ Тожикистонга шифокорлар билан бир қаторда контейнерлар, 10 та сунъий нафас олдириш аппарати ва жуда кўп тиббий халат, дори воситалари, қўлқоп, респираторлардан иборат инсонпарварлик ёрдами ҳам жўнатилгани ҳақида хабар берилган эди.
Эслатиб ўтамиз, Ўзбекистон Президенти Шавкат Мирзиёев 5 май куни Тожикистон президенти Эмомали Раҳмон билан телефон орқали мулоқот қилган. Мулоқот чоғида давлат раҳбарлари коронавирусга қарши кураш масаласи ҳамда Сардобада юз берган фалокатни муҳокама қилган.
Маълумот учун, дунёда коронавирус тарқалишига қарши кураш бошланганидан буён Ўзбекистон Хитойга, Эронга, Афғонистонга, Қирғизистонга, Тожикистонга, Беларусга, Озарбайжонга, Венгрия, Тожикистонга инсонпарварлик ёрдамини жўнатди. Ўз навбатида Ўзбекистон мазкур пандемияга қарши курашиш учун Хитой, БАА ва АҚШдан ёрдам олди.
Изоҳ (0)