Деярли янги Tesla Model 3 электромобилининг рули ҳаракат вақтида узилиб тушди. Автомобиль эгасининг сўзларига кўра, у машинани бир ой олдин расмий дилердан сотиб олган, деб хабар беради Motor.
Tesla автомобили эгалари бунга қадар лак-краскали қопламадаги муаммолар ва кузов деталлари орасидаги тирқишларга оид нуқсонлар ҳақида маълум қилган, бироқ рулнинг ҳаракат вақтида узилиб тушиши биринчи бор содир бўлмоқда. Нуқсонли Tesla Model 3’нинг британиялик эгасини сўзларига кўра, у ўз электромобилини бир ой олдин расмий дилердан харид қилган.
Таъкидланишича, муаммолар ҳатто харид қилиш босқичида бошланган: эркак автомобилни ўтган йилнинг октябрида олиши керак бўлган, бироқ етказиб бериш март ойига қадар чўзилган. Бу вақт орасида деярли барча давлатларда карантин жорий этилгани сабаб, у ўз автомобилини яхшироқ ҳайдаб кўришга ҳам улгурмаган.
Машина эгасининг қайд этишича, у анчадан буён Tesla’нинг ишқибози бўлиб, шу маркадаги электромобиль сотиб олишни саккиз йил олдин орзу қилган. Натижада у янги машинасида 550 километр масофа босишга муваффақ бўлган. Руль билан боғлиқ муаммо содир бўлган кун у 30 километргина юрган. Руль машина деярли тўхтаганида узилиб тушгани сабаб, машинага шикаст етмаган.
Tesla зудлик билан мазкур вазият бўйича ҳаракат қилган. Автомобиль сервисга олиб кетилган ва эртаси куни таъмирланган ҳолда қайтарилган. Ҳозирда компания муаммога нима сабаб бўлганини аниқлаш билан шуғулланмоқда.
Аввалроқ Tesla Model 3 автопилотда кетаётиб тўқнашувдан қочишга уринмагани ҳақида хабар берилганди.
Изоҳ (0)