Бухоро вилояти Ромитан тумани яқинидаги Варахша чўлида 12 май куни трактор тиркамасининг ағдарилиб кетиши оқибатида бир-бирига қариндош бўлган уч аёл вафот этди. Бу ҳақда «Дарё»га Ромитан туманидаги «Боғитуркон» МФЙ раиси Қобил Камолов маълум қилди.
«Боғитуркон» МФЙ Сарой қишлоғи фуқароси, 45 ёшли Ол.И. 12 май куни тонг саҳарда ўз бошқарувида бўлган «МТЗ-80» русумли тракторида турмуш ўртоғи Ф.Ж., синглиси Ой.И. ҳамда келини Ш.П.лар билан ипак қуртининг пилла тугишида уни бостириш учун Ромитан тумани ҳудудидаги Варахша чўлига ширпа ва сингрон қуруқ ҳашакларини йиғиш мақсадида жўнаган. Ол.И. уч аёл билан бирга ҳашакларни трактор тиркамасига юклаган. Трактор ҳайдовчиси бортида бир нафардан ортиқ одамнинг сиғмаслиги боис, уч аёл ҳашак ортилган тиркама устига ўтириб жойлашган.
«12 май куни соат 13:10 ларда фуқаро Ол.И. ўз бошқарувидаги трактори билан тумандаги ‘Нормурод Ниёз’ фермер хўжалиги дала ҳудудидан ўтган зовур йўлидан ҳаракатланиб келаётган вақтда йўл лойлиги сабабли трактор тиркамаси сирпаниб ағдарилиб кетган. Оқибатда тиркама устида бўлган 34 ёшли Ой.И. ҳамда 33 ёшли Ш.П. воқеа жойида вафот этган. 38 ёшли Ф.Ж. эса тан жароҳати билан туман касалхонасига ётқизилган», — деди «Дарё»га Бухоро вилоят ИИБ ахборот хизмати раҳбари Қувват Ярашов.
«Боғитуркон» МФЙ раиси Қобил Камоловга кўра, касалхонага ётқизилган учинчи аёл Ф.Ж. 13 май куни вафот этган.
«Афсуски, тракторчи ҳамқишлоғимизнинг турмуш ўртоғи ҳам касалхонада жон берди. Тирикчилик ғами бир-бирига қариндош ва яқин бўлган уч аёлнинг бевақт дунёдан кўз юмишига сабаб бўлди. Ҳар бирининг икки-уч нафардан фарзанди бор. Аксига олиб, Ой.И. ҳамда Ш.П.нинг турмуш ўртоқлари карантин сабабли Россиядан қайтолмаган. Туман ҳокимлиги кўмаги билан таъзия амаллари ўтказилмоқда», — деди маҳалла раиси.
Ҳолат юзасидан ҳайдовчига нисбатан Жиноят кодексининг 266-моддаси, 3-қисми, «а» банди (Одамлар ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ушбу модда бўйича айбдор деб топилган шахс 10 йилгача озодликдан маҳрум этилиши мумкин. Ҳозирда дастлабки тергов ҳаракатлари олиб борилмоқда.
Эслатиб ўтамиз, 3 май куни Сурхондарёда ҳам трактор иштирокида ЙТҲ юз берган ва унинг оқибатида 13 ёшли бола вафот этганди.
Изоҳ (0)