Россияда 55 млн рубль эвазига зирҳланган Audi сотувга чиқди. Уни ҳамма ҳам сотиб ололмайди

Audi’нинг Россиядаги офиси зирҳланган Audi А8L Security седани учун буюртмаларни қабул қилишни бошлади, деб хабар беради «Автоновости дня».

Маълумотларга кўра, автомобиль нархи 55 миллион рублдан бошланади, бироқ уни ҳамма ҳам сотиб ололмайди: барча буюртмалар Германияда тасдиқланади ва айрим мижозлар рўйхатдан ўчирилиши мумкин.

Audi А8L Security VR9/VR10 даражаси бўйича зирҳланган: VR9 билан шаффоф бўлмаган қисмлар, VR10 билан эса ойналар ҳимояланган. Муҳандисларнинг сўзларига кўра, седан аввал бошдан ўқ ўтмайдиган версия асосида лойиҳаланган ва йўловчиларни калибри 7,62 миллиметрга тенг ўқдан ҳимоялай олади.

Ташқи кўриниши билан седан одатдаги моделдан қалин ойналари ва бақувват шиналари билан фарқ қилади. Автомобиль кузови ва барча электроникаси нолдан бошлаб яратилган, шу сабабли зирҳли машина оддий моделдагидан қарийб 2 тоннага оғирроқ (А8L Security оғирлиги 4,5 тоннага тенг).

Салон бўйича зирҳли машина оддий А8’ники билан бир хил. Жиҳозланиши ҳам бир-бирини такрорлайди, фақат зирҳли моделда автоном ажратувчи қурилма ва марказий консолда авария блоки мавжуд. Унга махсус сигнални бошқарувчи тугмалар, авария ҳолатида ҳаво ҳайдаш ва ёнғинни ўчириш тизими ўрнатилган.

Машинага 571 от кучи ва 800 Нм айланувчи моментга эга 4,0 литрли муқобили йўқ битурбосаккизлик ўрнатилган бўлиб, у 8 поғонали автомат узатмалар қутиси ёрдамида бошқарилади.

Audi А8L Security нархи 55 миллион рублдан бошланади, бироқ нарх евро курсига қараб ўзгариши мумкин. Европада шу турдаги седан 700 минг евродан таклиф этилади.