Жанубий Кореяда сўнгги суткада коронавирусга чалинганлар сони 35 кишига ошди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб. Бу бир ой давомидаги кунлик касалланишлар сони бўйича рекорд кўрсаткичдир.
Мамлакатда 3 ҳафтадан ортиқ вақт давомида кунига ўртача 10 киши коронавирусга чалингани қайд этилаётганди. 10 май куни коронавирусга чалинганлар сони кескин кўтарилиб, 34 кишига ошди.
KCDC маълумотларига кўра, янги аниқланган 35 та касалланиш ҳолатларининг 29 таси маҳаллий, қолган 6 таси четдан юқтирилган.
Янги касалланиш ҳолатлари кўпайишига коронавирус борлиги гумон қилинган ва кейинчалик тасдиқланган 29 ёшли йигитнинг 2 майга ўтар кечаси Кёнгидо провинциясидаги Йонъин шаҳридан Сеулнинг одам гавжум бўлган Итхэвон ҳудудига боргани ва у ерда бир нечта клуб ва барларга киргани сабаб бўлган. Клублардаги бошқа шаҳарлардан дам олгани келган бир қатор шахслар ҳам вирус юқтириб олган. Айни пайтда клубда бўлганларнинг 85 нафарида вирус аниқланган.
Сеул администрацияси 24 апрелдан 6 майгача Итхэвондаги клубларга ташриф буюрган 5 500 ортиқ кишидан иборат рўйхатни тайёрлаб, ҳозирда уларнинг 2 400 дан ортиғи билан алоқа ўрнатган. Бироқ қарийб яна 3 минг нафари билан ҳали ҳам алоқа ўрнатишнинг иложи бўлмаган.
Ҳукумат касалланганлар сони яна ортиши кутилаётганини билдирган. Шу сабабли ҳукумат барча клублар ва кўнгилочар жойларни 7 июнга қадар ёпиш тўғрисидаги тавсия билан чиқди, Сеул маъмурияти эса бундай муассасаларни мажбурий равишда ёпиш тўғрисида буйруқ чиқарди.
Мамлакатда умумий ҳисобда коронавирусга чалинганлар сони 10 909 кишига етди, беморларнинг 9 632 нафари соғайган. 256 нафари вафот этган. Дунё бўйлаб эса коронавирусга чалинганлар сони 4 миллион кишидан ошиб кетди
Изоҳ (0)