Фельдмаршал Халифа Хафтар бошқарувидаги Ливия миллий армияси фуқаролар ва фуқаролик тузилмаларига ҳужум қилиши оқибатида Триполидаги Туркия элчихонасига зарар етган. Бу каби ҳолатлар такрорланадиган бўлса, Туркия қўшинлари ушбу ҳолатларга жавоб тарзида армияга ўт очишга мажбур бўлади, дейилган Туркия ТИВ хабарида.
Вазирлик хабарида 9 май куни Хафтарга алоқадор гуруҳлар Триполи марказига 100 дан ортиқ ракета йўллаган ва артиллерия билан шаҳарни фаол тарзда ўққа тутган.
Бир неча кун давом этган ҳаво ҳужумлари оқибатида пойтахтдаги дипломатик миссиялар, жумладан, Туркия элчихонаси, Митига аэропорти, парвозга тайёрланаётган фуқаро авиацияси самолётлари ва бошқа фуқаролик инфратузилмаси объектлари талафот кўрган. Ҳужумлар туфайли ўлганлар ва яраланганлар бор, дейилади Туркия ТИВ ахборотида.
«Ушбу воқеаларга жавобан Ливиядаги расмий ваколатхонамиз ва манфаатларимизга зарба бериладиган бўлса, Хафтар бошқарувидаги гуруҳларга қонуний йўл билан жавоб ҳужуми уюштирамиз», — дейилади хабарда.
Вазирлик Бирлашган Миллатлар Ташкилотининг Ливиядаги ушбу нотинч вазиятга ҳеч қандай муносабат билдирмаётганини танқид қилган.
«Хафтарга ҳарбий, молиявий ва сиёсий ёрдам кўрсатаётган кучлар Ливия халқининг азоблари, мамлакатдаги инқироз ва беқарор вазият ҳукмрон бўлишига алоқадор ва бунда бевосита айбдор», — дейилган вазирлик ахборотида.
28 апрелда фельдмаршал Халифа Хафтар тинчлик келишувидан чиқди ва мамлакатни бошқаришга қарор қилди, оқибатда Ливияда миллий иттифоқ ҳукумати шаклланди ва уни Фаиз Саррож бошқармоқда.
«Биз Схират сиёсий келишувини бекор қиламиз. У Ливия халқининг қарорига кўра ўтмиш сарқити, деб топилди ва ҳукумат манбаси бўла олмайди», — деган у.
Хафтарнинг қайд этишича Ливия миллий иттифоқи фуқаролик ва давлат институтлари учун шароитлар яратиш устида ишлайди ва Ливия халқини озод қилишда давом этади. Фельдмаршал ўз бошқарувидаги кучлар халқнинг азобларига чек қўйиш, фуқаролар манфаатларини ҳимоя қилиш, уларнинг истакларини бажо келтириб фаровонлиги учун курашади.
Икки кун ўтгач, Ливия миллий иттифоқи вакили Аҳмад ал-Мисмарий Рамазон ойида Хафтар армиясининг мамлакатдаги ҳарбий ҳаракатларни тўхтатишини маълум қилди. У қўшиннинг ушбу тинчлик аҳдлашувини бузганларга нисбатан жавоб ҳаракатларини амалга ошириши ҳақида огоҳлантирган.
Ушбу баёнотга қарамай Ливиядаги ҳарбий ҳаракатлар давом этган. Хусусан, 7 майда Италия ва Туркия ҳукуматлари Триполидаги «яшил ҳудуд»нинг ўққа тутилганини хабар қилди. Эртасига Италия ҳукумати ушбу ҳужум ортида Хафтар бошқарувидаги гуруҳлар турганини билдирди. Ливия миллий иттифоқи вакили Триполидаги фуқаролар яшайдиган ҳудудлар ва дипломатия объектларига уюштирилган ҳужумларга Хафтар армиясининг алоқаси йўқлигини маълум қилди.
Изоҳ (0)