«Ўзкомназорат»: Сирдарёда талафот кўрган алоқа объектлари қайта ишга туширилмоқда

Сардоба сув омборида юз берган техноген ҳодиса оқибатида телекоммуникация объектларига жиддий талафот етгани ҳақида хабар берилганди. Ахборотлаштириш ва телекоммуникациялар соҳасида назорат бўйича давлат инспекциясининг маълум қилишича, Оқолтин тумани Сардоба шаҳарчасидаги АТС ишга туширилган.

Талафот оқибатида мобил алоқа операторларининг база станциялари электр таъминотидан узилиб қолган, маҳаллий телекоммуникация тармоғининг инфратузилма (мактаб, маҳалла ва ҚВП) ташкилотларига тортилган ерости оптик толали алоқа кабелларига, магистрал ерости алоқа кабелларига зарар етгани туфайли фавқулодда ҳолатдан келиб чиқиб сув омбори ҳудуди атрофидаги станция қурилмаларида авария тиклаш ва демонтаж ишлари бошланган эди.

Таъкидланишича, Оқолтин тумани Сардоба шаҳарчасидаги АЦ (умумий монтаж сиғими 1152 рақамли, ишлатилган сиғими 567 абонент бўлган C&C08 RSP Huawei русумли станция, мавжуд сиғими 288 портли DSLАМ’да абонентлар сони 288 та) қайта таъмирланиб, ишга туширилган. Мазкур телефон станцияси дизель генератор орқали ишлаб турганлиги сабабли 3 май куни доимий электр тармоқларига уланган.

5 май соат 18:00 ҳолатига кўра, 5 та мобил алоқа операторларининг жами 86 та таянч станцияларидан 80 тасининг фаолияти тикланган, жумладан, 47 та таянч станцияси электр таъминотига қайта уланган, қолган объектларда эса зарурий таъмирлаш ишлари олиб борилган.

Сув тошқини сабабли Мирзаобод тумани ҳудудида жойлашган КМ-ТАЕ 61 магистрал алоқа кабели ўтказгичига зарар етганди, мазкур магистрал алоқа кабели бошқа кабел магистрали ва темир йўлга қарашли захира кабел магистралига тўлиқ ўтказилган.

Шунингдек, табиий офат талафотларини бартараф этиш ишларини тезкор ташкил этишда иштирок этаётганларга шароит яратиш учун вилоят фавқулодда вазиятлар бошқармасида ташкил этилган штабга 1205 қисқа рақами бириктирилиб, қўшимча равишда UzMobile стационар телефон аппаратлари ҳамда сим-карталар ажратилган.

Аввалроқ Сирдарёда сув тошқинидан сўнг 7,5 мингдан ортиқ хонадоннинг газ, 10 мингдан ортиқ хонадоннинг электр таъминоти тиклангани ҳақида хабар берилганди.