O‘zbekiston Energetika vazirligi va uning tizimidagi tashkilotlar tomonidan Sardoba suv ombori to‘g‘onining o‘pirilishi va undan keyingi toshqinlar natijasida yuzaga kelgan gaz va elektr energiyasi ta’minotidagi uzilishlarni qayta tiklash bo‘yicha tizimli ishlar amalga oshirilmoqda.

Foto: Energetika vazirligi matbuot xizmati

Toshqin oqibatlarini bartaraf etish maqsadida maqsadida Farg‘ona, Andijon, Namangan va Sirdaryo hududiy elektr tarmoqlari korxonalari, “Hududgaz Sirdaryo” kompaniyasi xodimlari tomonidan 330 nafar soha mutaxassislari, 76 ta avtotransport vositalari jalb qilingan.

Amalga oshirilgan ishlar natijasida gaz quvurlarining shikastlangan qismlari va ikki dona gaz taqsimlash qurilmalari texnik soz holatga keltirilib, qayta tiklangan. Natijada Sardoba tumani Paxtaobod shaharchasidagi 3 117 ta, Oqoltin tumanidagi 3 849 ta xonadonda va shu hududlardagi mavjud 192 ta ulgurji iste’molchilarda gaz ta’minoti to‘liq tiklangan.

Foto: Energetika vazirligi matbuot xizmati

Toshqin sababli boshqa hududlarga evakuatsiya qilingan aholini suyultirilgan gaz bilan uzluksiz ta’minlash uchun 223,7 tonna suyultirilgan gaz va 1 000 dona maishiy gaz ballonlar zaxirasi yaratilgan. Shuningdek, favqulodda holat yuz berganidan so‘ng viloyatning Sardoba, Oqoltin va Mirzaobod tumanlari elektr tarmoqlari inventarizatsiyadan o‘tkazilgan.

Birlamchi hisob-kitoblarga ko‘ra, to‘rtta 35/10 kilovoltli nimstansiyalar (Sardoba tumanidagi “Yangi hayot”, Mirzaobod tumanidagi “Baliqchi” va “Uchtom”, Oqoltin tumanidagi “Toirov” nimstansiyalari), 106 dona transformator punktlari, 492,7 kilometr elektr uzatish tarmoqlari suv toshqini ostida qolgan.

Foto: Energetika vazirligi matbuot xizmati

Elektr uskunalarini soz holga keltirish uchun ikki dona, quvvati 2500 kVA bo‘lgan transformator olib kelinmoqda, 500 dona temir beton tayanchlari, 24 tonna AS rusumli simlar, 73 kilometr SIP mahsuloti, 12 kilometr kabel, 54 dona transformator va 5,5 tonna transformator moyi jamg‘arilgan.

Farg‘ona, Andijon, Namangan va Sirdaryo hududiy elektr tarmoqlari korxonasilari tomonidan zudlik bilan qilingan sa’y harakatlar natijasida 10,2 mingdan ortiq xonadon elektr energiyasi bilan ta’minlandi.

“Avariya holatlarini bartaraf etish Favqulodda vaziyatlar vazirligi bilan hamkorlikda ruxsat etilgan hududlarda amalga oshirilmoqda. Toshqin oqibatida yuzaga kelgan avariyalarni bartaraf etish ishlari davom etoqda”, — deyiladi Energetika vazirligi axborotida.