Янги аниқланган маълумотларга кўра, Иккинчи Жаҳон уруши вақтида уруш ўчоғига айланган ўлкалардан Ўзбекистонга 1,5 миллион киши, жумладан, 250 мингдан зиёд бола эвакуация қилинган. Бу ҳақда Президент Шавкат Мирзиёев 9 май куни бўлиб ўтган тантанали маросимда айтиб ўтди.
«Халқимиз бу одамларнинг барчасига чинакам меҳр ва эътибор кўрсатди, сўнгги бурда нонини ҳам улар билан баҳам кўриб, юксак инсонпарварлик фазилатларини намоён этди», — деди Президент Шавкат Мирзиёев.
Олиб борилган илмий изланишлар туфайли жанговар орден ва медаллар билан мукофотланган Ўзбекистон вакилларининг сони бўйича ҳам ойдинлик киритилган. Шу пайтга қадар бу кўрсаткич 120 минг нафар деб қайд этиларди. Янги маълумотларга асосан, 200 мингдан зиёд ўзбекистонлик аскар ва офицерлар жанговар давлат мукофотлари билан тақдирланган.
«Жумладан, илгари 280 нафар деб ҳисоблаб келинган ўзбекистонлик Совет Иттифоқи Қаҳрамонларининг сони 301 нафар экани, 70 нафар юртдошимиз учала даражадаги Шон-шараф орденига сазовор бўлгани ҳужжатлар орқали ўз тасдиғини топди», — деди Президент.
Бундан ташқари, янги маълумотларга кўра, уруш йиллари Ўзбекистондаги 300 га яқин корхонада ҳарбий маҳсулотлар ишлаб чиқарилган. Шу даврда фронт ҳудудларидан Ўзбекистонга 151 та завод кўчириб келтирилган.
Президент ўзи нутқида «мана шундай бебаҳо ҳақиқатни юзага чиқариб, адолатни қарор топтиришга» ҳисса қўшган ўзбекистонлик тарихчи олимлар, илмий ва ижодкор зиёлиларга катта раҳмат айтди. Айни вақтда уларни бу борадаги изланишларни давом эттиришга, янги тарихий маълумотларни ҳар йили 9 май арафасида алоҳида китоб ҳолида нашр этишга чақирди.
Изоҳ (0)