Тошкент вилояти Бўстонлиқ туманида қўшнилар ўртасида жанжал келиб чиққан ва 33 ёшли Х.Х. эрини ҳимоя қилиш мақсадида икки кишини пичоқлаб қўйди. Бу ҳақда ИИВ ҳузуридаги Тергов департаменти хабар берди.
Бўстонлиқ тумани «Хўжа» МФЙда яшовчи қўшнилар 42 ёшли М.М. ва 47 ёшли К.М. ҳамда 35 ёшли У.Х. ўртасида 4 май куни соат 16:30 ларда аввалдан мавжуд бўлган низо сабаб ўзаро муштлашув юзага келган. Муштлашаётганларни кўрган Х.Х. ошхонадан пичоқ олиб, М.М. ва К.М.га тан жароҳати етказган ва турмуш ўртоғини ажратиб олган.
Натижада М.М. ва К.М. олган тан жароҳатлари билан Бўстонлиқ туман тиббиёт бирлашмасига олиб келинган, суд тиббий экспертиза хулосасига кўра, иккаласига ҳам оғир тан жароҳати етказилганлиги аниқланган. Ҳодиса жойини кўздан кечириш жараёнида бир дона ошхона пичоғи ва қон доғлари ашёвий далил тариқасида расмийлаштириб олинган.
Мазкур ҳолат юзасидан Бўстонлиқ тумани ИИБ ҳузуридаги Тергов бўлими томонидан Х.Х.га нисбатан Жиноят кодексининг 104-моддаси 1-қисми (Қасддан баданга оғир шикаст етказиш) билан жиноят иши қўзғатилиб, дастлабки тергов ҳаракатларига киришилган.
Изоҳ (0)