Ўзбекистонда телемедицинани жадал ривожлантириш керак. Бу ҳақда Президент Шавкат Мирзиёев 9 май куни Тошкентнинг Чилонзор туманида қурилган шаҳар 2-перинатал марказига ташрифи вақтида айтиб ўтди.
Аввал хабар берилганидек, перинаталга марказга ташрифи вақтида давлат раҳбари онлайн поликлиника дастури орқали шифокорлар билан мулоқот қилган.
«Коронавирус пандемияси кўзимизни очди. Тиббиётда ахборот технологиялари қанчалик муҳимлигини кўрсатди. Лекин бу бўйича шароитлар ҳам, ходимларнинг малакаси ҳам ҳали етарли эмас», — деди Президент.
Шу боис, давлат раҳбарининг таъкидлашича, ривожланган давлатлар тажрибаси асосида дастур ишлаб чиқиб, телемедицинани жадал ривожлантириш керак.
« Бу вақт ва харажатни тежайди, эпидемиологик хавфсизликни ҳам таъминлайди. Яна юқумли касалликлар тарқалмаслиги учун огоҳ, ҳушёр, тайёр бўлишимиз керак», — дея қўшимча қилди Президент Шавкат Мирзиёев.
Маълумот учун, Ўзбекистонда 9 май соат 18:25 ҳолатига кўра коронавирус инфекциясини юқтириб олиш билан боғлиқ 2349 та ҳолат қайд этилган; шу вақтгача 1803 нафар бемор соғайган, 10 нафар бемор эса инфекция асоратлари оқибатида вафот этган.
Изоҳ (0)