Шавкат Мирзиёев: Ҳар уч ўзбекистонликдан бири қўлига қурол олиб, фашизмга қарши жанг қилган

Шу вақтгача Иккинчи Жаҳон урушида 1,5 миллионга яқин ўзбекистонлик қатнашган, деб ҳисобланар эди. Президент Шавкат Мирзиёев Ўзбекистоннинг Ғалабага қўшган тўлиқ ҳиссасини аниқлаш йўлида олиб борилган сўнгги илмий изланишлар натижаларига таяниб маълум қилишича, Ўзбекистондан 1 миллион 951 мингга яқин киши урушга сафарбар этилган.

«Шу вақтга қадар уруш бошланган пайтда юртимиз аҳолиси 6 миллион 551 минг кишини ташкил этган ва уларнинг 1 миллион 500 мингга яқини урушда иштирок этган, деб ҳисобланарди. Янги маълумотларга кўра, Ўзбекистондан 1 миллион 951 мингга яқин киши урушга сафарбар этилган. Демак, ҳар уч нафар ўзбекистонликдан биттаси қўлига қурол олиб, фашизмга қарши жанг қилган», — деди Шавкат Мирзиёев 9 май куни ташкил этилган тантанали маросимдаги нутқида.

«Аёвсиз жангларда мардона қатнашган қарийб 451 минг нафар юртдошимизнинг номлари ва тақдири шунча йиллар мобайнида эътибордан четда қолиб келганини албатта адолатдан, деб бўлмайди. Шунингдек, ўша даврда ‘қулоқ’ сифатида бошқа ўлкаларга сургун қилинган 59 мингдан ортиқ ватандошимиз ҳам ҳаракатдаги армияга сафарбар этилгани маълум бўлди», — деди Ўзбекистон давлат раҳбари.

Шавкат Мирзиёевнинг қўшимча қилишича, «илгари 396 минг нафар Ўзбекистон фуқароси урушда ҳалок бўлган, деб айтиларди, аслида бу рақам 538 мингдан зиёд бўлган». Бундан ташқари, фронтда бедарак йўқолганлар ҳақидаги маълумотлар ҳам, Президентнинг таъкидлашича, тўлиқ бўлмаган — ҳозирги вақтда 158 мингдан кўпроқ ўзбекистонлик урушда бедарак кетгани аниқланган.

Президентнинг сўзларига кўра, ушбу янги маълумотлар «илгари ёпиқ бўлган архив ҳужжатларини, илмий жамоатчилик учун маълум бўлмаган материалларни» ўрганиш, собиқ Иттифоқ республикалари ва чет эллардаги архив ташкилотлари, музейлар ва фондлар, тарихчи олимлар ва мутахассислар, кенг жамоатчилик билан ҳамкорликни кучайтириш натижасида олинган.