Видео: 1,9 сонияда 100 км/соат тезликка чиқувчи Porsche модел

Кўпчилик Tesla Model S электрокари энг зўр суперкарларни «дабдаласини» чиқаришига ўрганиб қолган. Бироқ Баҳрайндаги EKanoo Racing компаниясининг модификациялашган Porsche 911 Turbo S модели ўзининг барча серияли «акалари учун» қасос олишга қодир, деб хабар беради CARakoom.

Стандарт жиҳозлари билан 911 Turbo S дунёдаги энг тезкор автомобиллардан бири ҳисобланади, бироқ EKanoo Racing томонидан киритилган ўзгартиришлар уни мутлақо енгилмасга айлантирган.

Ёрқин кўк рангли Porsche ўтказилган синов вақтида 60 миль/соат тезликка (96 км/соат) 1,87 сонияда, кейинроқ 130 миль/соат тезликка (209 км/соат) 5,31 сонияда эришган.

Автомобиль соатига 100 километр тезликка 5 сонияда чиқа олса, у жуда тезкор ҳисобланади. Аммо Porsche буни икки баробар камроқ вақт ичида уддалаган. Синов вақтида автомобиль чорак милни финишдаги 169,37 миль/соат тезлиги билан (273 км/соат) 8,443 сонияда босиб ўтган.

Мазкур Porsche 911 Turbo S анча йиллардан буён Баҳрайнда пойгаларда ES1XXX номи остида қатнашиб келади. Суперкар двигатели Туркиянинг Esmotor компанияси томонидан қайта ишланган бўлиб, 1073 от кучи ва 1393 Нм айланувчи моментга эга.