UzAuto Motors компанияси Россияда Chevrolet автомобиллар савдосини бошлай олмади. Савдоларнинг бошланмаслигига сертификатлаш билан боғлиқ муаммолар, олдинги Ravon маркасининг қарзлари, шунингдек, ҳозирда ҳам давом этаётган коронавирус эпидемияси каби омиллар сабаб бўлмоқда, деб хабар беради Motor.
UzAuto Motors General Motors’нинг Россиядаги ваколатхонаси март ойидаёқ бозорга чиқишни режалаштирган эди. Россияда пайдо бўлиши керак бўлган Chevrolet’нинг дастлабки моделлари орасидан Spark, Nexia ва Cobalt ўрин олганди. Улар Ravon R2, Ravon Nexia R3 ва Ravon R4 моделларини мос равишда алмаштириши керак эди.
Бироқ COVID-19 эпидемияси ва карантин чоралари сабаб Ўзбекистон ўз вақтида автомобилларни Россияга етказиб бера олмади. Моделларнинг Россия бозорига чиқиши камида ёз фаслининг ўрталарига қадар қолдирилди. Коронавирусга оид вазият яхшиланмаса, Chevrolet моделларининг Россияда пайдо бўлиши янада узоқроқ муддатга сурилади.
Ўтган йиллар давомида Ravon автомобилларини Россияга етказиб бериш борасида мунтазам муаммолар пайдо бўлгани сабаб ҳозирда UzAuto Motors’ни россиялик дилерлар қўллаб-қувватламаяпти. Буларнинг барчаси яқин келажакда Ўзбекистонда йиғилган Chevrolet русумидаги автомобилларнинг рус бозорига киришига деярли имкон бермаслиги мумкин.
Аввалроқ UzAuto Motors Россия ва МДҲ мамлакатларида Ravon бренди остида автомобиллар савдоси 2020 йилнинг ўрталарига келиб тўхташи ҳақида хабар берганди.
Эслатиб ўтамиз, 2019 йилнинг сентябрида Ravon Россия бозорига қайтаётгани маълум қилинганди. Маълумот учун, 2015 йил кузида «ЎзАвто» компанияси эскирган UZ-Daewoo ўрнида янги Ravon брендидаги автомобиллар ишлаб чиқарилишини эълон қилганди.
Изоҳ (0)