Украинанинг Никополь шаҳрида навбатдаги «вақт капсуласи» — 1990 йилда ишлаб чиқарилган «АЗЛК-2141» топилди. Автомобиль шу вақтга қадар 1996 километр масофа босган бўлиб, унинг салонидаги завод плёнкаси ҳали олиб ташланмаган, деб хабар беради Roma Uracco.
Маълумотларга кўра, автомобиль 1990 йилларда Москвадан миниб келинган ва ўшандан буён деярли ҳайдалмаган. «Москвич»нинг совет даврига оид транзит рақамлари ҳам сақлаб қолинган.
2014 йилга қадар автомобиль қуруқ ва иссиқ гаражда сақланган, шу сабабли ёшига қарамай машина кузови яхши сақланиб қолган. Олча рангли машинанинг салони жигарранг тусда жиҳозланган.
«Москвич»га 71 от кучига эга «УЗАМ-331.10» индексли двигатель ўрнатилган бўлиб, орадан шунча вақт ўтган бўлса-да, бир марта уринишдаёқ ўт олган. Автомобиль биргина «реставрация»га муҳтож бўлган — мойи, барча фильтрлари ва аккумулятори алмаштирилган.
«Москвич» ичидан автомобилдан фойдаланиш бўйича экспорт инструкцияси ва кўплаб оригинал қоғоз ҳамда квитанциялар топилган. Шунингдек, ўтган 30 йил давомида машина билан бирга муҳрланган олча рангли эмаль банкаси ҳам сақланган.
Мавзуга доир: Украинада қизил салонга эга ноёб «Жигули» топилди. Олчаранг машина деярли йўл босмаган (видео)
Изоҳ (0)