Ko‘pchilik Tesla Model S elektrokari eng zo‘r superkarlarni “dabdalasini” chiqarishiga o‘rganib qolgan. Biroq Bahrayndagi EKanoo Racing kompaniyasining modifikatsiyalashgan Porsche 911 Turbo S modeli o‘zining barcha seriyali “akalari uchun” qasos olishga qodir, deb xabar beradi CARakoom.
Standart jihozlari bilan 911 Turbo S dunyodagi eng tezkor avtomobillardan biri hisoblanadi, biroq EKanoo Racing tomonidan kiritilgan o‘zgartirishlar uni mutlaqo yengilmasga aylantirgan.
Yorqin ko‘k rangli Porsche o‘tkazilgan sinov vaqtida 60 mil/soat tezlikka (96 km/soat) 1,87 soniyada, keyinroq 130 mil/soat tezlikka (209 km/soat) 5,31 soniyada erishgan.
Avtomobil soatiga 100 kilometr tezlikka 5 soniyada chiqa olsa, u juda tezkor hisoblanadi. Ammo Porsche buni ikki barobar kamroq vaqt ichida uddalagan. Sinov vaqtida avtomobil chorak milni finishdagi 169,37 mil/soat tezligi bilan (273 km/soat) 8,443 soniyada bosib o‘tgan.
Mazkur Porsche 911 Turbo S ancha yillardan buyon Bahraynda poygalarda ES1XXX nomi ostida qatnashib keladi. Superkar dvigateli Turkiyaning Esmotor kompaniyasi tomonidan qayta ishlangan bo‘lib, 1073 ot kuchi va 1393 Nm aylanuvchi momentga ega.
Izoh (0)