Апрель ойининг охирларида Лос-Анжелес қирғоқларида Nissan ва Infiniti’нинг икки мингта автомобилини олиб келган Jupiter Spirit юк кемаси қарийб бир ҳафта машиналарнинг тушириб олинишини кутиб қолди. Порт сотилмаган машиналар билан тўла эканлиги оқибатида юкларни тушириш билан боғлиқ муаммо юзага келган. Бунга нафақат АҚШда, балки бутун дунёдаги автомобиллар саводасига таъсир кўрсатган коронавирус пандемияси сабаб бўлган, деб хабар қилади Motor.
Маълумотларга кўра, катталиги иккита футбол майдонидек келадиган кема 24 апрель куни АҚШга Nissan Armada йўлтанламаслари, Rogue кроссоверлари ва Infiniti седанларини олиб келган. Одатда уни бўшатиш учун ярим кун кетади, бироқ бу сафар Jupiter Spirit Лос-Анжелес қирғоқларида 29 апрелга қадар қолиб кетган. Бунга порт ва унинг яқинидаги омборлар автомобиллар билан тўлиб қолгани сабаб бўлган.
Коронавирус пандемияси фонида АҚШ бозоридаги кўплаб автобрендлар савдолар ҳажми тушиб кетганини маълум қилган. Масалан, апрель ойида Mazda’га бўлган талаб 2019 йилнинг апрелига нисбатан 44,5 фоизга тушиб кетган бўлса, Subaru’да ушбу кўрсаткич 47 фоизга тенг. Toyota — 54 фоизга, Киа — 38 фоизга, Genesis савдолари эса 50 фоизга тушиб кетган. Эксперларнинг фикрича, Шимолий Америка бозори апрель ойида 80 фоизга зарар кўради.
Аввалроқ Ҳиндистонда автомобиллар савдоси биринчи бор нолга қадар тушиб кетгани ҳақида хабар берилганди.
Изоҳ (0)