Коронавирус пандемияси туфайли юзага келган ҳозирги синовли кунларда Ўзбекистон Республикаси Президенти ташаббуси билан ташкил этилган «Саховат ва кўмак» умумхалқ ҳаракати мамлакат аҳолиси томонидан катта хайрихоҳлик билан қарши олинди.
Давлат хавфсизлик хизмати ходимлари ҳам ушбу хайрли ишга ўзларининг муносиб ҳиссасини қўшди.
Жумладан, ДХХ идораларида фаолият олиб борган 53 нафар боқувчисини йўқотган ёки ёлғиз яшаётган фахрийларга, ногирон ва ҳалок бўлган ҳарбий хизматчиларининг яқинларига, шунингдек, республикамиз бўйлаб 913 та ёрдамга муҳтож оилаларга жами 329 миллион сўмлик моддий ёрдам кўрсатилди.
Аввалроқ Андижон ИИБ «Саховат ва кўмак» жамғармасига 101 миллион сўм хайрия қилгани, Тошкент вилояти ИИББ Пробация бўлими томонидан «Саховат ва кўмак» умумхалқ ҳаракати доирасида ички ишлар органлари назоратида бўлган 150 га яқин шахсга ижтимоий кўмак кўрсатилгани хабар берилган эди.
Маълумот учун, «Саховат ва кўмак» умумхалқ ҳаракати ҳозирги оғир пайтда аҳолининг ёрдам ва кўмакка муҳтож қатламларини аниқ, манзилли асосда қўллаб-қувватлаш мақсадида ташкил этилган. Шавкат Мирзиёев ушбу умумхалқ ҳаракати Ўзбекистон янги тарихи саҳифаларидан мустаҳкам ўрин олишини таъкидлаган эди.
Президент ташаббусига кўра, пандемия шароитида эҳтиёжманд фуқароларга ва оилаларга ёрдам берган корхоналар ва тадбиркорларга давлат томонидан бир қатор имтиёзлар ва преференциялар берилади.
Изоҳ (0)